Selebrasaun kampaña mundiál Hapara Violénsia Hasoru Feto.Imajen: Rafy Belo

DILI, 10 dezembru 2019 (TATOLI) –Plan Internasionál Timor-Leste hamutuk ho parseiru sira hanesan ALFELA, Mane Ho Vizaun Foun (MHVF), Aliansa Labarik Feto ho apoiu husi Uniaun Europeia, selebra kampaña mundiál Hapara Violénsia Hasoru Feto, iha Salaun Luz Clarita, Acait, Dili, ohin.

“Plan Internasional iha ona comitment (kompromisu) boot atu hakotu violésia kontra feto no labarik feto iha Timor-Leste,” kompromete Diretora Plan Internasionál iha Timor-Leste, Diliana Ximemes perante públiku iha nia diskursu iha serimónia ho tema “Hamutuk Hakotu Violénsia Hasoru Feto no Labarik Feto:Haburas Relasaun Saudável”

Liuhusi selebrasaun loron mundiál direitu umanu no loron nasionál kampaña mundiál Hapara Violénsia Hasoru Feto, diretora Plan dezafia no ko´alia sai kona-ba violénsia ne’ebé akontese iha uma kain ida-idak. “Ita-nia inan no aman sira tenke forte hodi rezolve problema sira ne’e hotu”.

Plan mós, tuir Diretora Diliana Ximemes, hakarak transforma atetude kona-ba prátika ne’ebé fo périgu oioin ba ba labarik feto sira.

Plan buka atu hatene esperiénsia violénsia ho tipu saida mak labarik feto sira hasoru iha sira-nia moris tanba dala barak ema nunka hakarak rona sofrimentu feto sira nian depois hetan violensia. ita dala barak hanoin mak julga de’it nunka rona solusaun saida mak sira hakarak atu bele sai husi violénsia ne’e.

Plan mós iha kompromísu atu ajuda viajen labarik feto sira nian ho seguru husi dalan atu ba eskola. Plan halo peskiza realidade labarik feto barak abandona sira nia eskola tanba lao do’ok ba eskola hasoru violensia husi mane sira.

Diretora ne´e mós kompromete katak Plan sei ko´alia mós ho lider tradisionál sira (lia-na´in) tanba iha Timor-Leste figura sira hanesan ne’e iha kbi’it ne’ebé bo’ot, hodi haree kestaun ne´e.

Husi kompromisu sira ne’e mós plan tau kestaun kona-ba asuntu kaben sedu, mane labele obriga labarik feto sira atu kumpre ninia hakarak ho idade nurak, tenke respeita dignidade feto sira nian. Buka atu proteje feto sira husi risku violénsia oioin.

“Tenke fó fiar ba labarik feto sira atu ko´alia sai sira-nia hanoin hodi nune’e bele iha solusaun. Buka atu fahe informasaun importante ho komunidade no prontu dezafia kultura inklui grupu marzinalizadu sira iha área rurál no plan prontu foti pozisaun ida ho loloos hodi kontra forsa reduzivu,” nia enkoraja.

Ezekutiva Plan ne´e reforsa katak maske kompromisu sira ne´e Plan Internasionál kria maibé presiza serbisu hamutuk ho parseiru sira atu nune´e bele alkansa objetivu ne’ebé iha atu lori pás ba nasaun ida ne’e liuhusi partisipasaun feto no labarik feto sira nian.

Enkuantu, Embaixadór UE ba Timor-Leste, Andrew Jacobs afirma, violénsia kontra feto hanesan violasaun ba direitu umanu no ho forma diskriminasaun ba jéneru. Nia abut mak desigualidade entre mane no feto sira, ne´ebé asume forma oioin. Violénsia iha impaktu boot ba vítima sira no hatodan kargu signifikativu ba kustu iha sosiedade sira.

“Ida ne´e abuzu ne´ebé mak komún ba direitu umanu ne´ebé afeta jerasaun hotu, nasionalidade no komunidade,” dehan diplomata UE ne´e.

Violénsia kontra feto no labarik sira, nia akresenta, mak violénsia kontra ema umanu hotu. Ida ne´e destroi moris. Ida ne´e hapara dezenvolvimentu ekonomia. Ida ne´e la iha fatin ba mundu ida ne´e.“Maibé ita hotu hatene katak liuhusi ita-nia kompromisu ita sei nafatin dook atu halakon ida ne´e,” nia konsidera.

Embaixadór UE ba Timor-Leste, Andrew Jacobs haklaken, violénsia kontra feto sira akontese iha fatin hotu, inklui mós uma-laran. Tanba ne´e, nia husu atu mane sira mós kontribui atu luta hasoru violénsia kontra feto.

Luta hasoru violénsia kontra feto ne´e, diplomata UE hateten UE iha objetivu klaru. Katak, UE reprezenta estadu membru hamutuk 28 no abitante millaun 500, sei nafatin hamriik iha liña oin, ba esforsu internasionál atu defende direitu ba feto no joven feto foinsa´e sira hotu atu moris livre ho seguru.

“Ami hala´o ida ne´e ba ami-nia futuru no mós tempu agora nian tanba feto sira sai hanesan pilár ba sosiedade ne´ebé justu, nakloke no dezenvolvimentu demokrasia, no sei la iha ema ida mak bele hadau sira-nia liberdade hodi hodi hala´o sira-nia papel ho forma livre no seguru”.

“Sei la iha dezenvolvimentu sustentável bainhira feto sira la dezempeña sira-nia papel ho ativu,” friza diplomata ne´e.

Entretantu, selebrasaun ba kampaña mundiál Hapara Violénsia Hasoru Feto, partisipa husi foinsa´e no estudante sira, konvidadu espesiál sira inklu reprezentante SEIG (Sekretáriu Estadu Igualidade Jéneru).

Jornalista        : Tomé Amado

Editór              : Rafy Belo

HAKEREK NO HATÁN

Please enter your comment!
Please enter your name here