Reprezentante sira husi ESG 4 Setembru UNAMET iha kompetisaun Jornál Parede. Imajen: Rafy Belo

DILI, 10 dezembru 2019 (TATOLI) – Plan Internasionál Timor-Leste hamutuk ho parseiru sira hanesan ALFELA, Mane Ho Vizaun Foun (MHVF), Aliansa Labarik Feto ho apoiu husi Uniaun Europeia (UE), iha ámbitu selebra kampaña mundiál Hapara Violénsia Hasoru Feto, iha Salaun Luz Clarita, Acait, Dili, ohin, integra mós kompetisaun Jornál Parede (JOPAR) entre estabelesimentu ensinu sira hanesan ETI (Eskola Tékniku Informátika), Eskola Tékniku Vokasionál (ETV) 28 Novembru, Becora no mós ESG 4 Setembru UNAMET.

Iha kompetisaun ne´e, ESG 4 Setembru UNAMET mak sai primeiru vensedór. Segundu vensedór mak ETI no terseiru vensedór mak ETV 28 Novembru.

ESG 4 Setembru UNAMET sai primeiru vensedór tanba akumula valór 78 no ETI rekolla valór 66. Enkuantu, ETV 28 Novembru halibur valór 59. Rezultadu klasifikasaun sira ne´e bazea ba indikadór avaliasaun ekipa júri nian ne´ebé elabora no prepara husi Komisaun Organizadora (KO).

Indikadór sira ne´e mak hanesan layout/formatu, notísia, formatu letra, kreatividade, sistemátiku no aprezentasaun.

Indikadór sira ne´e bazea ba rekizitu avaliasaun sira hanesan kreatividade estudante iha kada grupu, ne´ebé atrai júri sira-nia vontade no atensaun ba iha tempu avaliasaun, maneira hakerek “JOPAR” tuir gramátika língua ne´ebé mak iha, sistema hakerek tuir matenek no kualidade liuliu maneira oinsá estudante sira iha kada grupu arruma opiniaun tuir orden sistemátiku no kualidade informasaun no maneira aprezentasaun.

Jerónimo Gonçalves, reprezentante estudante ESG 4 Setembru UNAMET hateten, oportunidade ne’e eskola fó ba sira nu´udar konfiansa ida ne’ebé sira simu ho kontente tanba hamutuk ninia kolega na’in haat seluk bele aprezenta rezultadu husi saida mak sira prepara durante tempu ne’ebé limitadu.

“Ami na’in lima lori eskola nia naran la hanoin atu buka manan maibé hakarak hetan liután esperiénsia maibé saida mak ami prepara ida ne’e mak ami-nia rezultadu,” hateten Estudante Jerónimo Gonçalves ho orgullu ba Ajénsia TATOLI.

Jerónimo konfesa maske sira konsege sai vensedór iha kompetisaun JOPAR ne’e maibé antes ne’e sira hasoru difikuldade boot tanba laiha esperiénsia kona-ba vida jornalizmu nian. Difikuldade boot ida mak oinsá atu hasoru fontes sira hodi ko´alia kona-ba kestaun violénsia hasoru feto no labarik feto sira. “Fontes sira laiha iha tempu atu hasoru ami estudante sira maibé liuhusi aprosimasaun ho gabinete kada dirasaun ikus mai konsege halo duni entrevista hodi bele publika iha Jornál Parede”

Ida ne’e, tuir nia katak esperiénsia ne’ebé akontese iha tempu preparasaun. Maibé, husi difikuldade sira ne’e ikus mai hatudu ninia rezultadu posetivu. Ekipa júri na’in tolu desidie hodi fihir ESG 4 Setembru mak sai vensedór.

“Ida ne’e oegullu boot mai ami na’in lima tanba moruk ne’ebé ami hasoru midar mós hein hela ami”.

Kompetisaun ba loron mundiál Direitu Umanu no loron 16 kampañia Hakotu Violénsia Hasoru Feto no Labarik Feto, Jerónimo promete kontinua aumenta esperiénsia hodi buka nafatin atividade relasiona ho JOPAR nian hodi nune’e bele ajuda fali kolega sira seluk hodi bele reforsa liután atividade ekstra iha eskola.

Nune’e mós Antoninho da Costa reprezentante husi Eskola ETV 28 Novembru Becora apresia ho kompetisaun ne’e maske hetan terseiru lugar ho valór 59 maibé, tuir nia, sira-nia ekipa kontente ho ida ne´e no konsidera sai hanesan motivasaun ida atu motiva no enkoraja liután sira hodi hakat ba oin nafatin ho esperansa.

“Oportunidade ne’ebé mak hetan hamosu kompromisu atu kontinua hamoris nafatin atividade Jornál Parede ne’e hodi bele motiva fali kolega sira seluk ne’ebé seidauk hetan oportunidade,” nia hateten.

Iha fatin hanesan, Rivaldo Sanches Tilman husi ETI ogullu ho eventu ne’e no sente kontente tanba bele sai segundu lugar ho valór 66.

Husi rezultadu ne’e, nia promete hamutuk ho grupu sei kontinua nafatin atividade ne’e atu bele promove atividade eskola nian ba estudante no profesór sira liuliu ba inan-aman sira atu bele hatene liután saida mak eskola halo.

Iha prosesu apuramentu rezultadu finál husi kompetisaun JOPAR, reprezentante ekipa júri, Rafael Ximenes de Assis Belo nu´udar reprezentante husi Ajénsia TATOLI-Ajénsia Informasaun Ofisiál Estadu Timor-Leste, kongratula kompetitór sira no husu atu labele satisfas no orgullu de´it ho rezultadu ne´ebé iha maibé buka aprende nafatin hodi dezenvolve no kapasita aan.

“Iha kompetisaun ne´e, la iha ida mak manan no la iha ida mak lakon; hothotu sai manan na´in maibé iha mak rezultadu no aprezentasaun di´ak hodi konvense ekipa júri sira atu deside. Buat ne´ebé kada grupu aprezenta, apresiasaun ida boot tebes ba júri sira”.

“Tanba ne´e, buka buka kapasita aan nafatin liuhusi atividade estra-kurrikulár ka atividade sira hanesan ne’e hodi bele promove di´ak liután atividade eskola nian ba futuru ida di´ak liután,” enkoraja Alumni Departamentu Komunikasaun Sosiál, Universidade Nasionál Timor Lorosa´e (UNTL) ne´e.

Jornalista        : Tomé Amado

Editór              : Rafy Belo

HAKEREK NO HATÁN

Please enter your comment!
Please enter your name here