Kapa judisium FEAU. Imajen: Nelia Fernandes

DILI, 09 dezembru 2019 (TATOLI)-Universidade Nasional Timor Lorosa´e (UNTL), Fakuldade Edukasaun, Arte no Umanidade (FEAU), tuir estatístika FEAU nian, divulga katak hahú 2003 to´o 2009, gradua ona estudante na´in 5.238 kompostu husi mane 2.755 no feto 483.

Enkuantu, ohin, FEAU realiza tan judisium ba estudante finalista na´in 256 ne’ebé kompostu husi feto 155 no mane 101, ne’ebé mai husi departamentu sia ho detallu hanesan hanesan departamentu Inglés estudante judisiariu hamutuk ema na’in 30, Departamentu Biologia hamutuk ema na’in 73.

Tuir mai, departamentu Matemátika hamutuk ema na’in 18, departamentu Kímika hamutuk ema na’in 41, departamentu Fízika hamutuk ema na’in 21, departamentu Língua portugeza hamutuk ema na’in 19, departamentu Ensinu Profesór Ensinu Báziku hamutuk ema na’in 29, departamentu Desportu hamutuk ema na’in 21 no departamentu Tetun hamutuk ema na’in 4.

Dekana FEAU, Ana Cristina Martins motiva, la iha ema ida atu hetan susesu sem liuhusi dezafiu oioin, dezafiu hanesan barreira ka dalan ba hetan susesu.

Dekana FEAU, Ana Cristina Martins. Imajen: Nelia Fernandes

“Ikus saida mak hela ho imi, ne’e imi-nia susesu no imi-nia orgullu, tenke fiar aan nafatin katak la iha dalan seluk atu hetan susesu sem enfrenta dezafiu sira ne’e, importante mak korajen no forte nafatin ho prinsipiu ida metin katak, ha’u tenke termina ha’u-nia estudu,” hateten Dekana FEAH Ana Cristina Martins liuhusi diskursu iha ámbitu Judisium ba dala-XXII ho tema “Competente para servir com pensamento creativo” iha FEAU, Liceu, UNTL, ohin.

“Ohin ho imi-nia (estudante judisiariu) fiar aan, korajen no prinsípiu ida metin no esforsu hothotu, mak ohin imi mai hamriik iha fatin ida ne’e hodi simu atribuisaun títlu akadémiku hanesan imi-nia rezultadu finál mak imi mehi atu hetan duni ohin sai realidade, tanba ne’e tenke valoriza saída mak imi hetan”.

Dekana ne´e enkoraja mós: “Ha’u fó korajen ba inan-aman sira ba imi-nia oan sira-nia susesu, fó hanoin nafatin ba sira atu nune’e sira tenke luta nafatin ba oin nafatin. tenke hetan pão fuan ida iha imi-nia liman. Ohin loron iha igualidade oportunidade, la’ós igualidade jéneru, igualidade oportunidade jeneru mane ho feto la hanesan”.

“Tanba ne’e ha’u fó korajen seja imi feto, imi tenke luta esforsu imi-nia aan atu hetan paun fuan ida iha imi-nia liman, la’ós feto he’in de’it labarik iha uma, la’ós feto he’in de’it sana iha uma, la’ós ida ne’e mak ha’u hakarak.Ita-nia país presiza ita atu bele prienxe dezenvolvimentu ida ne’e, dezenvolvimentu ne’e ita tenke valoriza,” hateten dekana inkluzivamente ba judisiásira feto no jeralmente ba judisiáriu sira.

Akadémika UNTL ne´e relembra perante judisiáriu sira katak judisiáriu ohin loron hetan susesu, iha mós balun antes ne´e to´o de´it iha klaran tanba  difikuldade barak husi família ka inan-aman la iha kbiit no balun hanoin badak lakohi luta ba oin. “Kuandu ita lakohi luta hasoru tuir gostu ne’ebé iha bele hamate ita-nia futuru tanba ne’e atu bele fó kbiit mai ita labele haluha atu reza, atu hetan kbiit nafatin husi Nai Maromak atu imi rasik bele lori imi-nia aan to´o ba futuru ne’ebé mak imi hakarak”

Dekana FEAH, Ana Cristina Martins hateten katak, Serimónia Judisium sai ona hanesan kulturál ida iha fakuldade.

“Bainhira estudante ida, nia hahu ou nia inisia nia estudu no konklui nia estudu nia kumpri nia obrigasaun akademika hanesan teória pratika no seluk tan, mak liu husi prosesu ida naran terus, durante iha nia estudu ne’ebé nia hala’o iha universidade ou iha Instituisaun akademika ida to’o ikus mai nia iha direitu, atu hetan atribuisaun ba titlu akademiku ne’ebé estabelese ona, iha istituisaun akademika ida”.

 Nia reforsa tan katak, susesu ne’ebé judisiáriu sira hetan liuhusi prosesu ida naruk tebes. “Dala ruma iha realidade halo ita hasoru dezafiu oioin hanesan halo ita to’o stress, dala ruma halo ita sente baruk, kolen no lakon esperansa hanoin atu deziste tiha”.

Difikuldade hirak ne’e, tuir Dekana FEAU, Ana Cristina Martins katak labele sente hanesan problema ida maibé tenke kontinua luta ba oin, ho ida ne’e atu dezafia liután no fó oportunidade mai atu buka hatene liután.

“Hetan susesu ba buat ne’ebé ita rasik hakarak tau iha imi-nia neon, dezafiu sira ne’ebé imi enfrenta la hela ho imi tanba nia hanesan pasajen ida atu hetan susesu,” nia konklui.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here