Xefe Suku Parlamentu, Postu Administrativu Lautem, Munisípiu Lautem, Ângelo Calvão Silva/ Imajen Tatoli,IP

LAUTEM, 09 dezembru 2019 (TATOLI) – Xefe Suku Parlamentu, Postu Administrativu Lautem, Munisípiu Lautem, Ângelo Calvão Silva, konsidera Ministériu Agrikultura no Peska (MAP) abandona hela laboratóriu peska nian iha Teno tanba to’o agora seidauk utiliza.

“Laboratóriu Peska iha Suku Parlamentu, ita haree ba situasaun agora ema la book an no haree fatin ne’ebá abandonadu, maski laboratóriu konstrui iha 2007 no finaliza iha 2009, kaer hosi empreza nasionál Fantiza, Lda”, katak autoridade lokál ba Ajénsia TATOLI iha nia rezidénsia Bairru Teno, Suku Parlamentu, ohin.

Nia preokupa katak laboratóriu peska ne’ebé abandonadu hafoin empreza finaliza konstrusaun iha tinan 2009, enkuantu nu’udar autoridade lokál laiha informasaun tanba saida maka la utiliza.

“Ne’e polítika nivel altu sira-nian, ami autoridade lokál laiha informasaun ba ida ne’e to’o agora, hafoin obra ne’e hahú iha 2007 to’o ohin loron”, lamenta.

Nune’e mós, Empreza Fantiza, Lda, halo kontrusaunn mós ba guest house nian ho millaun $1-resin iha área Teno ne’ebé kompleta ho sasán toba nian iha laran, inklui fatin laboratóriu ne’ebé uza kustu millaun $1-resin.

Tuir observasaun autoridade lokál katak ekipamentu balun iha laboratóriu laran hanesan jeleira (kulkas) no seguransa sivíl mós sira kontrata no kontinua asegura hela laboratóriu ne’e.

“Ami rona informasaun de’it katak sei halo diplomasia hela ho empreza internasionál balun atu mai investe no loke fábrika iha tasi-ibun área Teno, Suku Parlamentu nia”, dehan.

Aleinde ne’e, autoridade lokál mensiona mós ró tolu ne’ebé maka MAP sosa no daudaun atraka iha portu Com maibé kondisaun mós la di’ak hotu ona. “Ró sira ne’e dodok hotu ona no iha tasi-ibun portu Com nian”, salienta.

Ró tolu ne’e ho objetivu atu halo operasaun ka tula ikan sira mai iha laboratóriu hodi teste no análize molok ba fábrika hodi halo ba ikan-lata, nune’e ró sira ne’e halo operasaun dalimak ona, maibé ikan ne’e la mai prosesa iha laboratóriu maibé ikan transfere ba kedas Japaun.

“Ha’u sente triste oituan tanba ida ne’e polítika nivel aas nian atu loke postu traballu ba joven sira no inan-aman ne’ebé sei iha forsa, maibé ita haree buat sira ne’e abandona”, nia manifesta.

Nune’e maka Governu tenke iha kompromisu atu dezenvolve situasaun hirak ne’e, tanba ne’e atu uza osan povu nian, presiza uza ho didi’ak atubele benefisia povu iha suku Parlamentu, entretantu, autoridade lokál sei halo rekomendasaun diretamente ba MAP atubele utiliza laboratóriu ba atividade seluk hodi hatama reseita ruma ba Estadu ka suku ne’e.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here