Korpu Bombeiru ho apoia husi komunidade sira halo intervnesaun hamate ahi ne'ebé han motuk kioske hamutuk 100-resin iha antiga Merkadu Comoro, Dili, 9 Dezembru 2019. Imajen/Antonio Goncalves

DILI, 09 dezembru 2019 (TATOLI)-Populasaun iha kapitál Dili, liuliu hirak ne’ebé horik iha Comoro nian, ohin, purvolta tuku 11: 00 Otl, hakfodak no tuku-tuur, haree kondisaun kioske 100-resin iha area Antiga  Merkadu Comoro, Aldeia 05, Suku Comoro, nakfilak sai anar metan tanba ahi han mutuk didi’ak.

Kondisaun kioaske ho hela fatin balun 100-resin ahi han mutuk iha antiga Merkadu Comoro, Dili 9 Desembru 2019. Imajen/Antonio Goncalves

Kioske nain hosi sira la konsege salva buat ida. Sira halai salva-an no ropa isin-lolon de’it. “Inséndiu ne’e lori tristeza boot ba família uma 100-resin ne’e,” haktuir Cesario Freitas ho João Ximenes,  nu’udar vítima hosi vítima kioske 100-resin ne’ebé ahi han ne’e ba Ajénsia TATOLI iha fatin akontesimentu.

“Ha’u sente triste loos tanba sasán hotu la salva, maibé ha’u agradese ba parte Governu liuliu Ekipa Servisu Bombeiru ho mós juventude bairru laran no bairru viziñu sira kolabora mai ajuda ami,”  haktuir Cesario Freitas ho João Ximenes.

Iha fatin hanesan Xefe Aldeia 05, Egídio Freitas, dehan, nia parte mós hakfodak  tebes bainhira haree ahi suar maka’as. Nune’e, nia buka tuir hodi halo komunikasaun para bele hetan apoia husi viziñu sira no parte relevante.

“Ha’u seidauk hatene motivu hosi ahi han uma ne’e,” hateten Egídio Freitas.

Informasaun seluk ne’ebé haktuir hosi fonte vítima sira seluk konfirma katak, deskonfia  inséndiu ne’e akontese tanba  kauza husi fogaun iha kioske ida nia laran mak rebenta  bainhira kioske nia nain te’in hela hahán meiudia nian.

Tuir observasaun Ajénsia TATOLI nian iha fatin akontesimentu nota katak,  korpu Bombeiru ne’ebé hetan apoiu husi ekipa karreta Pertamina Indonézia halo hela servisu maka’as hodi halo intervensaun rega mate ahi atu la bele da’et ba too viziñu sorin-sorin.

Membru Bombeiru Munisípiu Dili, Marcelino Moreira informa, kioske sira ne’e ahi han hotu, tanba kondisaun uma harii besik malu liu no maioria uza materiál ne’ebé fasil para ahi han lalais, hanesan triplex, plástiku no seluk tan.

Ekipa Polisia Eskuadra Comoro, Dili, hamutuk ho xefe aldeia inklui membru Konsellu Polisiamentu Komunitáriu (KPK) no juventude sira,  akompaña hosi eis Vise Ministru Transporte Telekomunikasaun, Inácio Moreira, halo intervensaun tuir forsa hodi evakua vítima nia sasán balun ba fatin ne’ebé seguru.

To’o notísia ne’e públika, autoridade relevante sira sei halo hela investigasaun no halo levantamentu profunda atu buka hatene fukun loloos  hosi insidente ne’e.

Jornalista : Osória Marques/Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here