Inan-feton Rosália Prisca hosi aldeia Ana-hun, suku Odomau, Postu Administrativu Maliana, Munisípiu Bobonaru, halo nia atividade tuku fatuk. Imajen/António Gonçalves.

Bobonaro, 07 novembru 2019 (TATOLI) – Loron matan oin namlaek. Rai atu kalan ba daudaun. Iha dalan ninin, iha aldeia Ana-hun, suku Odomau, ha’u haree inan-feton ida tuku hela fatuk.

Nia liman kuana kaer martelu ki’ikoan baku rahun hela fatuk, nia liman karuk hisik hela kosar.

“Oan, ha’u kolen loos, ha’u kosar makaas tanba tuku fatuk ne’e todan, maibé oan sira-nian eskola no nesesidade uma-laran nian obriga ha’u tenke halo serbisu hanesan mane”, inan-feton dehan ne’e ba Ajénsia TATOLI liuhusi dada lia ho dada iis naruk be naruk.

Lian halerik ne’e hato’o husi inan-feton Rosália Prisca hosi aldeia Ana-hun, suku Odomau, Postu Administrativu Maliana, Munisípiu Bobonaro.

“Dalaruma ha’u hanoin ho triste maibé ida ne’e maka moris, tanba ha’u la serbisu hanesan ne’e, ha’u mós sei la hetan osan, nune’e maka ha’u esforsu hanesan inan sira seluk atu ha’u bele sustenta moris loroloron”, nia haktuir.

Ida ne’e maka realidade moris hosi Rosália Prisca ne’ebé hala’o nia atividade loroloron iha estrada ninin, taka hena ida ba ulun hodi satan netik loron nia manas hafoin tuku fatuk hodi fa’an ba ema ne’ebé kaer projetu no ema seluk mós bele hola hodi halo uma rasik.

“Ha’u sente kole loos bainhira ha’u tuku fatuk ne’ebé toos tebes, ha’u forsa laek maibé ha’u serbisu hanesan mós mane hodi bele hetan osan, se ha’u la kolen, ha’u mós sei labele hetan duit ruma”, katak.

Inan-feton ne’e serbisu tuku fatuk hahú hosi tuku 7:00 dadeer to’o tuku 17:00 loro-kraik, maibé fulan ida maka foin halo karada ida maski serbisu loroloron, fatuk karada ida ho presu $80 no bele to’o $90.

“Ha’u-nia serbisu loron-loron maka tuku fatuk, serbisu seluk laiha, ha’u mai tuku 7:00 dadeer to’o loro-kraik maka ha’u fila, reit ida ha’u halo to’o fulan ida nia-laran”, nia dehan.

Rosália Prisca hatutan fatuk ne’e nia lalin hosi kilómetru haat hodi mai to’o estrada ninin hafoin tuku, ida ne’e maka atividade loroloron, maibé mós dalaruma nia laen no oan maka ajuda hodi tuku fatuk.

Entretantu, serbisu tuku fatuk ne’e, hahú iha tempu ukun an, ne’ebé maka uluk karada ida $1.50, maibé agora presu foin sa’e ba $80 ka $90. Ema hirak ne’ebé mai hola hosi Balibo no Cailaico.

Rosália Prisca nian oan iha na’in-lima, feto tolu no mane rua, feto ida gradua ona husi Universidade da Paz (UNPAZ) no mane ida gradua ona iha Universidade Nacional Timor Lorosa’e no na’in-ida hola mane ona, no seluk sei estuda iha ensinu sekúndariu.

Jornalista : Zezito Silva
Editora : Maria Auxiliadora

HAKEREK NO HATÁN

Please enter your comment!
Please enter your name here