Prezidente Komisaun C-PN, Fernanda Lay. Imajen Tatoli/António Gonçalves

DILI, 05 dezembru 2019 (TATOLI)—Prezidente Komisaun C (Finansa Públika), Maria Fernanda Lay, hateten impaktu hosi orsamentu duodesimál halo ekonomia rai-laran monu, tanba laiha dezenvolvimentu no investimentu.

“Impaktu hosi duodesimál halo ekonomia rai-laran monu, tanba ita laiha dezenvolvimentu, laiha investimentu”, Prezidente Komisaun C Parlamentu Nasionál (PN) ne’e ko’alia iha resintu Parlamentu Nasionál, kinta ne’e.

Nia esplika, ekonomia rai-laran monu tanba jere kada fulan de’it no uza nafatin saldu hosi orsamentu jerál Estadu (OJE) 2019 nian.

Fernanda argumenta, situasaun sira-ne’e mosu tanba kapasidade ezekusaun orsamentu ki’ik tebes, entaun halo Governu deside retira proposta lei orsamentu 2020 nian.

Nia afirma, orsamentu duodesimál labele mosu kuandu Governu halo proposta orsamentu tenke estruturadu, tenke tuir Lei Orsamentu no Jestaun Finanseira, verba sira tenke haan-malu ho planu anuál.

Prezidente Komisaun C ne’ebé trata asuntu Finansa Públika ne’e rekoñese diskusaun orsamentu tarde difísil ba Governu atu hasa’e kreximentu ekonómiku.

“Governu bele propoin, maibé Parlamentu Nasionál haree urjente ka lae. Se la urjente, tinan oin mak la’o.

Tanba ne’e, presiza la’o neineik mak rekopera fali ekonomia iha rai-laran, tanba nasaun ne’e la’ós hamriik iha tinan ida de’it.

“Governu problema iha ezekusaun. Laiha kapasidade. Entaun, ita presiza ajustamentu di’ak, tanba ita foti osan liu kapasidade Fundu Minarai, entaun Parlamentu tenke haree didi’ak”, Fernanda esplika.

Nia afirma, Governu bele iha ambisaun maibé ezekusaun ki’ik, entaun problema.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here