Diretór Edukasaun Munísipiu Manatuto, Eduardo Guterres. Imajen Tatoli/Joanico de Araújo

MANATUTO, 04 dezembru 2019 (TATOLI) – Diretór Edukasaun Munísipiu Manatuto, Eduardo Guterres, hateten Sentru Aprendizajen no Formasaun Eskolár (CAFE-sigla portugés), ne’ebé iha de’it ida iha Munisípiu Manatuto, respeitu rásiu númeru alunu tuir padraun ne’ebé estabelese hosi Ministériu Edukasaun.

“Eskola CAFE ne’e ita bele dehan sira nia kondisaun di’ak tebes. Kona-ba númeru alunu mós sira respeita tebes rásiu ne’ebé mak Governu hatete tanba iha sira nia sala ne’e alunu barak liu mak 30”, dehan Diretór ne’e ba Agência Tatoli iha nia kna’ar fatin, kuarta ne’e.

Nia dehan, durante ne’e eskola CAFE to’o ona nono ano maibé tinan ne’e to’o ona décimo ano.

“Ein termu númeru profesór mós sira sufisiente, kondisaun eskola di’ak, no distribuisaun alunu no profesór sira kumpre duni rásiu”, nia akresenta.

Enkuantu, ba eskola públiku iha Munisípiu Manatuto, sei difísil atu kumpre rásiu tanba númeru profesór falta.

“Iha eskola públika, atu ko’alia kona-ba rásiu ne’e difísil la halimar tanba eskola públiku balun, alunu hosi primeiro ano to’o quarto ano iha profesór ida de’it. Ida-ne’e mak diferensa entre eskola CAFE ho eskola públiku sira”, nia realsa.

Iha parte seluk, Koordenadora eskola CAFE Manatuto, Teresa Gonçalves, informa eskola CAFE iha sala aula 11, ne’ebé kada sala akumula alunu másimu 30, iha profesór timoroan na’in-12 no profesór portugés na’in-12.

Eskola CAFE Manatuto, iha tinan ida ne’e  iha alunu hamutuk 560.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here