Diretór Ezekutivu Telkomcel, Yogi Rizkian Bahar. Imajen/Telkomcel.

DILI, 05 dezembru 2019 (TATOLI) – Operadór Telekomunikasaun Telkomcel iha Timor-Leste, ohin lansa produtu foun iha Timor Plaza, hanaran T.PAY, ho objetivu atu fasilita tranzasaun eletrónika no hamenus tranzasaun cash

“Sosa hahán uza produtu T.PAY (Timor Pay), liuhosi QR Code (Quick response code), ne’e hanesan teknolojia foun ida husi ita no ita bele sosa buat ruma sein uza osan cash”, informa Diretór Ezekutivu Telkomcel, Yogi Rizkian Bahar, ohin.

Vantajen hosi produtu T.PAY maka sidadaun hotu bele uza halo transferénsia osan hosi munisípiu ida ba munisípiu seluk, importante maka tenke uza aplikasaun ida ne’e, atu sosa buat ruma la’ós osan cash ka hamenus sirkulasaun pagamentu osan cash, maibé aplikasaun ne’e sei pilotu durante fulan neen nia-laran.

Produtu T.PAY hanesan esforsu ida hosi empreza Telkomcel hodi dezenvolve ekonomia Timor-Leste, tanba atividade ekonomia barak maka akontese liuhosi cash, nune’e maka Telkomcel serbisu hamutuk ho Banco Central Timor-Leste (BCTL) atu kontrola sirkulasaun osan, tanba ne’e sei kria branch hosi Telling Digital Group (TDG) no Telling Digital Solution (TDS).

“Ida ne’e hanesan kontribuisaun Telkomcel nian iha ámbitu TDS hodi dudu ekonomia, tanba bá futuru ita hakarak produtu sira hosi Same, Lautem no seluk tan bele sosa ema sira hosi Dili, ita iha ona aplikasaun ne’e atu responde ba movimentu ekonómiku iha Timor-Leste”, katak.

Yogi Rizkian Bahar louva BCTL tanba kooperasaun ne’ebé hatudu profisionál tebes, tanba Telkomcel husu lisensa iha marsu 2019, BCTL asesu dokumentu hotu no fó lisensa iha outubru fulan kotuk, katak banku hala’o nia kna’ar di’ak tebes.

“Ami hakarak hato’o obrigadu wa’in ba fiar hosi Banku Sentrál ba TDS hodi konkretiza aplikasaun ida ne’e”, agradese.

Iha fatin hanesan, Vise-Governadór BCTL, Venancio Alves Maria, salienta produtu T.PAY importante tanba bele fasilita tranzasaun eletrónika no hamenus tranzasaun cash, la’ós la presiza osan cash maibé BCTL dudu sistema pagamentu ne’ebé modernu no efisiente iha Timor-Leste, nune’e bele hamenus sirkulasaun pagamentu osan cash.

Entretantu, BCTL autoriza Telkomcel ba produtu T.PAY tanba prienxe ona rekizitu ka prosedimentu legál no jurídiku, tanba ne’e T.PAY sai hanesan pilotu durante fulan neen no sei aplika de’it ba sira-nia funsionáriu, maibé sei halo revizaun hodi haree katak bele ona ka lae atu sira hetan lisensa.

“Tenke kumpre lei hotu iha Timor-Leste, liuliu lei kona-ba sistema pagamentu”, Venancio Alves Maria konklui.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here