Prezidente Autoridade Munísipiu Manatuto Fernando Sousa. Imajen Tatoli/Joanico de Araújo

MANATUTO, 04 dezembru 2019 (TATOLI)  Maski seidauk hetan podér lokál absoluta hosi Governu sentrál ba autoridade munisípiu, Prezidente Autoridade Munísipiu Manatuto Fernando Sousa, hateten servisu administrativu Manatuto durante ne’e la’o ho di’ak no laiha difikuldade ruma sein lejizlasaun ne’ebé suporta.

“Kona-ba administrasaun nian, hahú iha setembru 2016, iha ona dekretu lei n°3/2016, hafoin tinan 2017 iha alterasaun iha n°9, ne’ebé hosi administrativu la’o ho di’ak hosi delagasaun kompénsia ne’ebé mak fó mai ami”, dehan Fernando Sousa ba Agência Tatoli iha nia kna’ar fatin, kuarta ne’e.

Nia dehan, daudaun ne’e administrasaun Manatuto estabelese ona diresaun ualu hosi Sekretariadu Munisípiu Manatuto, Postu Aministrativu to’o iha suku sira.

Maski iha difikuldade balun tanba laiha lejizlasaun hanesan Lei Podér Lokál, Administradór ne’e fiar loron ruma polítika desentralizasaun sei estabelese ho di’ak iha munisípiu hotu.

“Loos, iha parte ida ita tenke esklaresidu didi’ak lai. Ne’e sei to’o iha ne’ebá agora daudaun ne’e la’ós nasionál la intrega podér, maibé delega de’it kompeténsia. Maibé hanoin katak loron ida sei to’o iha ne’ebá, bainhira lei sira ne’e estabelese ona”, nia realsa.

Autoridade Munisípiu ne’e iha esperansa katak loron ida tenke desentraliza Munísipiu Manatuto no Munísipiu seluk.

“Desentralizasaun ne’e ami Munísipiu 12 espera katak loron ida desentraliza duni. Atu nune’e Munísipiu ida-idak bele jere ninia munisípiu mesak. ida-ne’e mak ita hotu nia esperansa”, nia akresenta.

Entretantu, Governu desde inísiu tau ona prioridade ba funsionamentu instituisaun Estadu nian ho preparativu sira atu implementa Polítika Desentralizasaun Administrativa no Podér Lokál, hodi estabelese iha munisípiu 12 tuir saida maka define ona iha lei númeru 11/2009, 7 outubru.

Inisiativa ne’e tanba Governu konsidera Polítika Desentralizasaun Administrativa no Podér Lokál importante atu tulun dezenvolvimentu setór privadu iha área rurál hodi promove mós instituisaun Estadu sira atu sai forte liután, maski nune’e seidauk iha lejizlasaun atu suporta polítika ne’e.

Governu inisia ona Lei Podér Lokál no Lei Desentralizasaun Administrativu, maibé iha setembru 2017, Prezidente Repúblika, Francisco Guterres ‘Lú Olo’, veta ho razaun sei dúvida ho kontrolu Governu Sentrál ne’ebé bele lakon ba Administradór sira.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here