Diretór Jerál Pekuária no Veterinária, MAP Domingos Gusmão. Imajen/Florencio Miranda Ximenes.

DILI, 05 dezembru 2019 (TATOLI) – Governu liuhusi Ministériu Agrikultura no Peska (MAP) sosa ona fahi rasa hamutuk 150 husi Indonézia ho orsamentu rihun $33.

 “Sosa fahi ne’e planu Ministériu Agrikultura no Peska nian ho orsamentu 2019 nian ho montante rihun $33 iha fundu apoia joven ka apoia komunidade sira”, Diretór Jerál Pekuária no Veterinária MAP, Domingos Gusmão, ba TATOLI iha knaar fatin Komoro, ohin.

Diretór Jerál ne’e dehan fahi rasa ne’e sosa husi kompañia Mota Loes, Lda, bazeia ba proposta husi Diresaun Jerál Pekuária no aprova husi Ministru Agrikultura no Peska, Joaquim José dos Reis Martins no konkursu liuhusi aprovizionamentu MAP nian.

“Agora, fahi to’o tiha ona fronteira Batugadé ne’ebé ha’u orienta ona ami-nia tékniku sira halo hela preparasaun atu bá halo inspesaun hodi lori mai Timor-Leste ohin (5/12) no aban (06/12)”, katak.

Kritériu MAP atu fó fahi ba benefisiáriu ne’e, nia dehan liuhusi proposta ne’ebé hatama ona husi grupu benefisiáriu iha munisípiu sira.

“Ita la’ós naran fó de’it ba komunidade, maibé tékniku sira simu proposta no sei bá halo verifikasaun depois mak ita deside hodi fó”, afirma.

Domingos Gusmão dehan ohin loron ikus liu tékniku sira fó dadus kompletu hanesan proposta balun husi Munisípiu Ainaro, Manufahi, Covalima, Baucau, Viqueque, Liquiçá no Maliana inklui Ermera. Enkuantu, MUNISÍPIU balun laiha tanba la hatama proposta.

“Ita la fahe rata, maibé depende ba sira hatama proposta, só Munisípiu Dili nia mak iha proposta, maibé ita la fó tanba sidade labele hakiak fahi”, afirma.

Tuir planu fahi rasa ne’e tau iha sentru hakiak fahi iha Atabae, hodi tékniku sira halo inspesaun no distribui kedan ba benefisiáriu sira tuir proposta ne’ebé iha ona.

Moras ASF La Afeta

Entretantu, tuir dekretu lei Kuarentena no Bioseguransa no. 21/2003, artigu 56 define klaramente katak bandu importasaun fahi no produtu fahi husi nasaun sira ne’ebé afetadu moras ASF (African Swine Fever). Bainhira moras ASF la’o namanas iha Ázia.

“Ha’u fó garantia Moras ASF la afeta tanba ita iha Diresaun Nasionál Veterinária no médiku, planu aplika Bioseguransa liuhusi tratamentu sanitária no vasinasaun”, Diretór Jerál ne’e dehan.

Hodi hatutan, antes moras ASF ne’e iha, Governu halo ona konkursu públiku no kompañia sosa ona mak foin virus ne’e mosu.

“Ita halo tiha konkursu ne’ebé kompañia manán na’in ba sosa tiha ona fahi mak moras ASF mosu, ne’ebé ita laiha buat ida atu impede kompañia hodi hatama fahi mai”, katak.

Nia dehan, daudaun ne’e kompeténsia Ministériu Agrikultura ninian mak oinsá atu aplika tékniku adekuadu para fó bioseguransa ba fahi sira ne’e atu labele afeta ba moras ASF ne’e hodi fó ba benefisiáriu sira atu sira bele hakiak.

Hatán ba moras ASF bele afeta fahi sira ne’e, nia dehan tuir tékniku MAP mós iha membru OIE (Organizasaun Mundiál Saúde) ne’ebé delegadu OIE sempre fó relatóriu kona-ba moras animál kada semana no fulan.

 “Liga moras ASF ne’e ita nasaun afetada ne’ebé ita mak hasai ka esporta fahi mak ema impede, ita haree nasaun ne’ebé livre husi moras ASF ne’e ita bele importa mai atu hakiak fali ne’e laiha problema”, esplika.

Fahi rasa ne’e sosa iha Kupang-Indonézia ne’ebé livre husi moras ASF ne’ebé Governu rekomenda ne’e bele tama.

“Ita mak rekomenda tama, tanba ne’e programa Ministériu Agrikultura. Tanba fahi sira mate hanesan ne’e ita tenke substitui atu hasa’e produsaun fahi nian liuhusi asaun importasaun ka sosa fahi”, afirma..

MAP liuliu ekipa Diresaun Pekuária no Veterinária komesa atensaun liuliu médiku veterináriu hodi hametin bioseguransa nian hodi fahi hirak ne’ebé tama labele afeta moras ASF no mate tan.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here