Prezidente Autoridade Munísipiu Manatuto, Fernando Sousa. Imajen Tatoli/Joanico de Araújo

MANATUTO, 04 dezembru 2019 (TATOLI) – Prezidente Autoridade Munísipiu Manatuto, Fernando Sousa, hateten bainhira atu dezenvolve no transforma fatin antigu Colégio Soibada, presiza diskusaun ne’ebé kle’an entre parte Governu, Komunidade no Dioseze.

Colégio ne’ebé lokaliza iha Postu Administrativu Soibada, Munisípiu Manatuto ne’e, nu’udar fatin ne’ebé forma ona misionáriu sira, inklui  Saudozu Francisco Xavier, Nicolau Lobato, líder nasionál hanesan Ramos Horta, Rogério Lobato no seluk tan.

“Fatin Colégio ne’e ita presiza iha koordenasaun no diskusaun kle’an entre komunidade iha ne’ebá, Misaun no Governu iha nasionál para ita bele hadi’a. Se bele to’o mós Santuáriu Nossa Señora Aitara ne’e. Tanba ida-ne’e mós Santuáriu Timór nian no bele sai hanesan turizmu relijioza iha Timór. Kuandu ita halo planu didi’ak bele fó mós reseita ba ita-nia nasaun liuliu ba Munisípiu Manatuto”, dehan Fernando ba Agência Tatoli, iha nia knaar fatin, kuarta ne’e.

Notísia Relevante: Amu Tiago Husu Governu Hadi’a Colégio Soibada Ne’ebé Abandonadu

Nia mós konsidera, Colégio Soibada hanesan viveiru Timór ninian.

“Ami Manatuto-oan sente hanesan ne’e tanba husi fatin ne’e mak uluk Amu-Lulik sira haruka Mestre sira dezloka hanorin iha munisípiu Timór laran”, nia haktuir.

Fernando Sousa dehan, iha 2019 liuhosi projetu Planu Dezenvolvimentu Munisípiu (PDM), daudaun ne’e konstrui hela eskola tékniku vokasionál iha Soibada.

Nune’e mós, relasiona ho kondisaun Santuáriu Nossa Señora Aitara, ne’ebé mak ho kondisaun ladún di’ak, Administradór ne’e dehan iha ona diskusaun kona-ba asuntu ne’e.

“Kona-ba ida-ne’e foin lalais Konsultivu Munisipál mós ami ko’alia ona. Maibé ida-ne’e hanesan parte hosi igreja ninian, entaun parte autoridade lokál mós tenke iha koordenasaun di’ak lai ho Parokia Soibada iha ne’ebá, hafoin ho Dioseze Baucau ninian mós tenke halo konsulta ho ami-nia autoridade nasionál,” nia subliña.

Iha parte seluk, Fernando Sousa esplika kona-ba dalan dirasaun ba Colégio Soibada no Santuáriu Nossa Señora Aitara, ne’ebé daudaun ne’e ho kondisaun ladún di’ak, tanba nu’udar projetu nasionál, parte autoridade munisípiu halo koordenasaun ona ho Ministériu Obra Públika nasionál nune’e bele aselera lalais obra estrada.

“Parte ami-nian mai koordena beibeik ho Obra Públika nasionál nian, tanba ne’e nu’udar projetu nasionál ninian. Komunidade sira hato’o preokupasaun kona-ba estrada ba ami, tenke hato’o fali ba nasionál tanba ne’e kompeténsia nasionál nian, la’ós ami nian. Maibé, ami la’ós haree hela de’it, la’e. Ami sempre relata preokupasaun komunidade ba nasionál”, nia salienta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here