Xapa matríkula. Imajen espesiál

DILI, 05 dezembru 2019 (TATOLI) – Empreza Caicobilari Supplies Unipessoal, Lda, hatama ona xapa matríkula hamutuk 16.702 no sei falta 6.159 tanba sei iha prosesu nia-laran maibé garante katak tarde liu semana oin bele kompleta ona.

Diretora Empreza Caicobilari, Genoveva Fátima Araújo Amaral, haktuir antes ne’e empreza entrega ona xapa matríkula hamutuk 10.140 no tuir fali hatama tan rihun-neen, enkuantu totál hamutuk 16.702 ne’ebé entrega ona ba Diresaun Nasionál Transporte Terrestre (DNTT), hosi totál ne’e, xapa karreta nian hamutuk 1.954 no motorizada 14.748.

“Ami hatama ona xapa matríkula ho totál 16.702 ba lojístika DNTT, maibé sei falta 6.159, ami promete sei finaliza iha fulan ne’e nia-laran”, dehan nia ba Ajénsia TATOLI liuhosi Whatsaap iha Indonézia, ohin.

Enkuantu, hosi totál xapa matríkula 16.702, iha mós xapa ne’ebé seidauk marka númeru hamutuk 2000, ho objetivu atu responde situasaun emerjénsia ka bainhira motór ka karreta xapa lakon.

Genoveva dehan hosi kontratu ne’ebé maka nia kompañia iha konkursu ne’e katak kompañia Caicobilari tenke halo produsaun ba xapa karreta no motór hamutuk 22.861 inklui xapa espesiál hamutuk 75.

“Plat mamuk sira ne’e inklui hotu ona iha 16.702 ne’ebé ami hatama foin daudaun ne’e ba iha DNTT”, Genoveva hateten.

Kontratu ne’ebé maka Ministériu Transporte no Komunikasaun halo ho Empreza Caicobilari mak prodús xapa matríkula hamutuk 22.861.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here