Primeiru-Ministru aprezenta programa Governu liuhusi Orsamentu Jerál Estadu 2020 iha Parlamentu Nasionál. Imajen/ Egas Cristovão.

DILI, 05 dezembru 2019 (TATOLI)—Reprezentante povu iha Parlamentu Nasionál, hateten susar ba VIII Governu Konstitusionál atu atinje kreximentu ekonómiku to’o pursentu 7.2 iha 2020 tanba diskusaun orsamentu jerál Estadu (OJE) tarde.

Deputadu Bankada Parlamentár FRETILIN, Fabião de Oliveira, dehan orsamentu 2019 nian sei hotu iha 31 dezembru, enkuantu diskusaun 2020 nian seidauk hahú no bele kontinua adia tan, entaun bele submete ba duodesimál.

“Ne’e fó implikasaun boot ba dezenvolvimentu ekonomia iha rai-laran. Agora daudaun ita hasoru ona krize polítika ekonomia. Projetu sira la la’o. Buat Barak la akontese. Ida-ne’e susar ba Governu atu atinje kreximentu ekonómiku to’o pursentu 7.2 iha tinan oin”, Fabião ko’alia ba Tatoli iha Parlamentu Nasionál, kinta ne’e.

Deputadu bankada opozisaun ne’e preokupa dadus kreximentu ekonómiku entre Governu ho Banku Mundiál nian.

“Iha diferensa tanba tuir Banku Mundiál nian iha 2019 atinje %3. Previzaun ba 2020 ne’e mak sei atinje pursentu 4.5. Agora, Governu nian dehan kreximentu ekonomia ne’e pursentu 5 iha 2019. Previzaun ba 2020 mak pursentu 7.2”, nia haktuir.

Nia husu Aliansa Mudansa Ba Progresu (AMP) tuur hamutuk rezolve problema internál, labele lori mai plenária mak diskute no falta koordenasaun.

Iha parte seluk, Deputadu Bankada Parlamentár Klibur Haburas Unidade Nasionál Timor Oan (KHUNTO), António Nobre, akresenta nasaun ne’e moris ho orsamentu duodesimál dezenvolvimentu sei la la’o.

“Se ita la’o ho orsamentu duodésimu fó impaktu ba ita-nia prosesu desenvolvimentu, tanba ita halo buat ida laiha kapitál dezenvolvimentu”, nia esklarese.

Entretantu, Deputadu Partidu Libertasaun Populár (PLP), Sabino Soares ‘Guntur’ , haklaken sei labele atinje kreximentu ekonomia iha tinan oin tanba impase polítika ne’e hahú dezde 2017.

“Órgaun soberanu sira halimar hotu iha laran, tanba ne’e mak povu tenke sofre. Agora, ita tama ona dezembru maibé orsamentu seidauk debate no seidauk aprezenta tan ba Prezidente Repúblika. Posibilidade orienta tan ba fatin seluk, ne’e problema boot ba ita-nia ekonomia”, nia katak.

Tuir nia, orsamentu 2020 dalaruma iha fulan-abríl 2020 mak foin implementa.

Maibé, Deputadu Bankada Parlamentár CNRT, Patrocínio Fernandes dos Reis, esklarese buat ida previzaun ne’e hanesan alvu Governu nian, maibé depende ba sirkunstánsia hotu-hotu ne’ebé bele fasilita no sustenta Governu.

Tuir nia, previzaun ne’e demonstra vontade serbisu atu atinje kreximentu ekonomia ne’ebé Governu hakarak.

“Ita hotu tenke orgullu tanba Governu ida-ne’e iha vontade di’ak hakarak halo previzaun sira hanesan ne’e. Tanba, se to’o duni iha ne’ebá sei benefísia povu no nasaun”, nia tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here