Prezidente Tribunál Rekursu (PTR), Deolindo dos Santos. Imajen/Egas Cristóvão

DILI, 05 dezembru 2019 (TATOLI)-Kompañia  China International Economic Coorporation Group Co.Ltd, sai vensedór ba konkursu públiku ba projetu konstrusaun edifísiu Tribunal Distritál Dili (TDD).

Obra ho valor orsamentu milaun $10-resin ne’e, ohin, halo ona asina kontratu entre obra nain Tribunal Rekursu ne’ebé asina diretamente hosi Prezidente Tribunal Rekursu (PTR), Deolindo dos Santos, ho kompañia vendedór hosi nasaun Xina ne’e.

PTR Deolindo dos Santos, esplika, tuir prosesu normal bainhira asina tiha kontratu ne’e sei haruka fali ba Ajénsia Dezenvolvimentu Nasional (ADN) no Komisaun Nasionál Aprovizionamentu (CNA-sigla portugés) hodi submete fali ba iha Cámara das Contas hodi halo vistu préviu durante loron 30.

“Mais tarde, iha inísiu tinan 2020 bele hahú ona projetu ne’e,” informa Deolindo dos Santos, iha ámbitu selebrasaun asina akordu entre parte sira.

Deolindo dos Santos esklarese katak, edifísiu foun atu konstrui ne’e ninia medida sei luan no boot liu kompara ho edifísiu Tribunal Distritál agora, inklui estabelese fatin ba juis ho defensór sira atu hala’o sira nia knar hodi fó atendimentu públiku di’ak liu tan.

Iha fatin hanesan Ministru Justisa Manuel Cárceres, garante katak, edifísiu foun ne’e sei halo nia kapabilidade infraestrutura  adekuadu hodi kria kondisaun dignu  iha tribunál.

Jornalista  :Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here