Jornalista Ajénsia TATOLI, Francisco Simões, halo entrevista ho Ministru Negósiu Estranjeiru, Dionisio da Costa Babo Soares, iha ámbitu Bali Demokrasia Forum iha Nusa Dua, Bali, kinta (05/12/2019). Imajen/Mídia CI

BALI, 05 dezembru 2019 (TATOLI)- Timor-Leste nia partisipasaun iha forum nivel rejionál no internasionál importante tebes atu kontinua projeta imajen Timor-Leste iha mundu.

Foto hamutuk partisipante sosiedade sivíl ho Mídia iha Bali Forum Demokrasia, kinta (05/12/2019). Imajen/Mídia CI

Lia hirak ne’e afirma hosi Ministru Negósiu Estranjeiru  (MNE), Dionisio da Costa Babo Soares, hodi responde Ajénsia TATOLI, ohin, bainhira reprezenta governu Timor-Leste partisipa iha Bali Demokrasia Forum (Bali Democracy Forum/BDF) ne’ebé hala’o iha Sentru Konvensaun Nusa Dua, Bali, Indonézia.

Bali Demokrasia Forum ne’ebé hala’o durante loron rua, hosi loron 05 to’o loron 06 dezembru, ba tinan ne’e, ho tópiku sentrál “Demokrasia ho Inkluzividade”.

Forum internasionál ne’ebé partisipa hosi reprezentante governu, sosiedade sivíl, juventude no mídia hosi nasaun sira Sudeste Aziátiku no Pasífiku, inklui kontinente Afrika  ho organizasaun internasionál sira seluk tan ne’e  hetan abertura  ofisiál  hosi Ministra Negósiu Estranjeiru no Kooperasaun Repúblika Indonézia (MENLU RI, sigla indonézia), Retno Marsudi.

Lider karizmátiku, Kay Rala Xanana Gusmão, nu’udar mós patronu ida hosi patronu sira seluk ba eventu nivel internasionál  Bali Demokrasia Forum ne’e rasik.

Ministru Dionisio Babo Soares, afirma, partisipasaun Timor-Leste nian importante tebes para haree oinsá mak demokrasia ne’e bele abranje ba hotu-hotu, liuliu ba sira ne’ebé mak aban bainrua lori nasaun ne’e ba oin.

Nia afirma tan, iha buat rua mak TL presiza haree atu lori nasaun ida la’o ba oin ho di’ak no prósperu; ida, lideransa (leader ship), katak nasaun ida atu la’o ba oin tenke iha lideransa ida ne’ebé di’ak no  lideransa ida ne’ebé tepat.  Rua,  tenke iha polítika fó garante katak partisipasaun ema hotu nian importante ba desizaun públiku.

“Iha sesaun ministru sira nian, ha’u sei hateten ba partisipante sira katak Timor-Leste nia intensaun importante mak jere pás no estabilidade atu lori dezenvolvimentu ekonómiku,”  hateten Dionisio Babo.

Antes ne’e, Ministra Negósiu Estranjeiru no Kooperasaun Repúblika Indonézia, Retno Marsudi, iha nia diskursu ba serimónia abertura Bali Demokrasia Forum ba dala-12, afirma katak, importante tebes asegura demokrasia atu bele iha pás.

Ministra Retno Marsudi afirma tan, demokrasia hanesan objetu atu bele harii pás, estabilidade no prosperidade ba ema hotu.

Bali Demokrasia Forum, ba tinan ne’e, partisipa hosi nasaun 90 iha mundu, inklui organizasaun internasionál hitu.

Bali Demokrasia Forum hanesan forum diskusaun no kolaborasaun  entre nasaun sira demokrasia iha Ázia ne’ebé sempre hala’o iha dezembru, tinan-tinan iha Bali, Indonézia.

Forum ne’e nia objetivu  atu haforsa kapasidade demokrasia no hametin instituisaun demokrasia liuhosi diskusaun entre nasaun sira no nasaun 20 mak sai hanesan patronu no membru ba forum ne’e.

Bali Demokrasia Forum ba da-uluk hala’o iha loron 10 to’o loron 11 dezembru 2008  ho tópiku sentrál “Building and Consolidating Democracy: A Strategic Agenda for Asia.”

Jornalista  : Francisco Simões

Editór        : Xisto Freitas

HAKEREK NO HATÁN

Please enter your comment!
Please enter your name here