Membru Ajente Xefe Servisu Investigasaun Kriminál Nasionál (SIKN), Gastão Piedade. Imajen/Eugénio Pereira

DILI, 04 dezembru 2019 (TATOLI)– Governu Timor-Leste no Servisu Investigasaun Kriminál Nasionál (SIKN) labele kriminaliza sidadaun Timor-oan ne’ebé koñesidu iha rede sosiál Facebook ho identidade  Gusty Amaral, ne’ebé  konsumu ai-moruk droga no insulta lider polítiku iha Facebook, tanba Timor-Leste la iha akordu estradisaun entre Police-to-Police (PtoP) no Government-to-Government (GtoG).

“Se Gusty Amaral mai fali Timor-Leste ita sei halo observasaun ba nia ho aproximasaun persuazivu para oinsá bele muda nia pensamentu, mais atu kriminaliza nia labele, tanba nia konsumu ai-moruk iha ema nia rain no Lei bandu kriminaliza ema kuandu akontesimentu ne’e iha rai seluk. So úniku dalan ida de’it maka ita bele halo mak kria, kooperasaun estradisaun entre  Police-to-Police (PtoP) no Government-to-Government (GtoG), maibé akordu ne’e la iha,” esplika membru Ajente Xefe SIKN, Gastão Piedade, hodi hataan pergunta durante sai oradór hodi sosializa programa prevensaun droga ba joven Timor-oan ne’ebé hala’o hosi SIKN ba funsionáriu tomak hosi Kompañia Telekomsel iha salaun Golgota, ohin, iha Raikotu, Dili.

Gastão esplika tan, akordu estradisaun PtoP ho GtoG importante tebes hodi iha baze legál bainhira Timor-Leste nia sidadaun halo kazu krime ou lori ai-moruk droga tama ba rai seluk, Timor-Leste bele kriminaliza sidadaun ne’e iha rai seluk hodi mai julga iha tribunál Timor-Leste nian.

Akordu estradisaun ne’e atu fasilita servisu polisia livre kontrola kualkér sidadaun ida hosi nasaun seluk labele livre atu halai subar iha nasaun seluk.

Ajente Xefe Gastão esplika, sitasaun ida ne’e akontese mós  kazu kazál Timor-oan JPS no AS ne’ebé autoridade polisia Indonézia kaer iha  kuarta (29/05/2019) liubá labele lori mai julga iha Tribunál Timor-Leste, tanba la iha akordu estradisaun entre Polisia Timor-Leste no Polisia Indonézia inklui akordu governu rua.

“Kazu  ita nia kazál Timor-oan rua ne’e ita labele haruka fila, ekipa ida ba too ne’ebá (Kupaun-Indonézia) para atu halo negosiasaun para barter, maibé lei Indonézia mak la fó dalan, ita tenke respeita,” nia hateten.

Tuir nia katak, situasaun ida ne’e diferente ho kazu sidadaun estranjeiru na’in neen (6) ne’ebé uluk Polisia Timor-Leste kaer no haruka fila-fali ba sira nia rain, tanba lider polítika sira maka foti desizaun haruka fila bazeia ba kooperasaun polítika de’it.

“Agora so úniku dalan ida de’it, se  maka uluk (lider polítiku) mak fó fila sidadaun Indonézia na’in neen (6) ne’ebé fila ba sira nia rain, nia (lider) mak bele lori fali ita nia sidadaun na’in rua ne’e mai fali,” tenik nia.

Durante halo sosializasaun, joven sira mós preokupa durante ne’e ema barak média sosiál ka teknolojia modernu cybercrime halo mal-trata ba lider Timoroan sira nu’udar problema boot iha sosiedade nia haree.

Hatán ba preokupasaun ne’e, Gastão esplika, Estadu Timor-Leste liu hosi Parlamentu Nasionál presiza halo ona lei ida hodi bele kriminaliza ema bainhira uza média sosiál difama ema nia dignidade.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here