Reprezentante Estadu Vatikanu iha Timor-Leste, Núnsiu Apostóliku, Monseñor Marco Sprizzi, bainhira hala’o audiénsia ho Prezidente Repúblika, Francisco Guterres Lú Olo iha Palásiu Prezidensiál Bairro Pité, kinta (05/12). Imajen/Mídia PR

DILI, 05 dezembru 2019 (TATOLI)   Líder másimu Igreja Katólika, Papa Francisco enkoraja Prezidente Repúblika (PR), Francisco Guterres Lú Olo no husu polítiku sira iha Timór atu buka dalan rezolve konflitu polítika iha rai-laran ho dalan diálogu.

Papa hato’o lia hirak ne’e, liuhosi reprezentante Estadu Vatikanu iha Timor-Leste, Núnsiu Apostóliku, Monseñor Marco Sprizzi, bainhira halo audiénsia ho PR Lú Olo.

“Ha’u hakarak enkoraja no agradese ba Prezidente nia esforsu tomak no enkoraja liután nia atu halo diálogu relasiona ho konflitu, tensaun no difikuldade ne’ebé nasaun ne’e enfrenta, nune’e bele rezolve tuir konstituisaun no tuir Povu Timór nia hakarak atu moris iha pás no armonia hodi kria kondisaun ba dezenvolvimentu”, tenik Monseñor Marco Sprizzi hafoin hala’o enkontru ho Xefe Estadu iha Palásiu Prezidensiál Bairro Pité, kinta ne’e.

Nia esklarese liután katak, Vatikanu sempre akompaña nafatin situasaun iha Timór no promete sei la tama iha konflitu interna iha kulker nasaun.

“Papa sempre apela ba pás, la’ós de’it esterna maibé mós interna. Tenke iha Pás no diálogu hodi hetan solusaun, tanba Igreja iha povu nia sorin no husu atu polítiku sira iha ámbitu sira-nia kompeténsia, atu bele foti desizaun tuir Konstituisaun no konforme povu nia interese”, nia subliña.

Iha kontekstu ida ne’e, nia konsidera bele favorese kondisaun ida di’ak liu ba sira ne’ebé presiza tulun liuliu ba labarik no joven sira ne’ebé presiza tebes edukasaun, formasaun, saúde, no buat hotu ne’ebé mak sira presiza.

“Tanba ne’e mak presiza estabilidade polítika no armonia sosiál”, Monseñor haklaken Papa Francisco nia lia menon.

Reprezentante Vatikanu ne’e mós konta tuir katak, antes ne’e Papa Francisco hetan entrevista husi jornalista, hafoin Papa vizita iha Japaun no jornalista husu kona-ba situasaun iha Honkong ne’ebé mós moris iha konflitu no violénsia nia laran maibé Papa sempre ko’alia nafatin kona-ba pás no estabilidade polítika.

Nia mós informa katak, durante enkontru, Xefe Estadu hato’o Povu Timór ninia saudasaun ba Santu Padre Papa Francisco no dezeja loron ruma bele vizita Timór.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here