Estudante sira hamarik formatura hodi simu vizita Prezidente Republika, Francisco Guterres Lú Olo ba Eskola Sekundária Jerál Públiku (ESJP) Seran-Kotek, Munisípiu Covalima, Kinta (27/06/2019). Imajen/Eugénio Pereira

DILI, 04 dezembru 2019 (TATOLI) – Estudante Finalista husi ensinu Sekundáriu Jerál (ESG) no Ensinu Sekundáriu Tekníku Vokasionál (ESTV) hamutuk 17.693 ne’ebé konkorre iha vaga rihun 3.865 atu tama iha Universidade Nasional Timor Lorosa’e (UNTL) no Institutu Politékniku Betano (IPB) hein hela rezultadu korresaun husi Ministériu Ensinu Superiór Siénsia no Kultura (MESSK).

Totál Kandidatu ne’ebé konkorre atu tama iha Institutu Superiór Públiku rua ne’e hamutuk 17.693. Totál númeru ne’e fahe ba parte rua mak hanesan siénsia naturál hamutuk 9.277 no siénsia sosiál no umanidade hamutuk 1.517 no vaga ne’ebé mak prepara ba kandidatu sira ne’e hamutuk rihun 3.865.

“Ita fahe vaga ne’e ba parte rua. UNTL nian iha rihun 3.675 no IPB nian ita tau 200 de’it. Agora parte UNTL nian ho vaga ne’ebé iha, ita fahe ba rejime rua jerál no espesiál. Ne’eduni rejime jerál totál vaga 1.774 no rejime espesiál totál vaga 1011,” informa Ministru Ensinu Superiór Siénsia no Kultura, Longuinhos dos Santos iha Ministériu Edukasaun, Vila Verde, ohin.

“Institutu Politékniku Betano (IPB) rasik iha de’it vaga 200 no vaga ne’e fahe ba rejime jerál 140 no 60 vaga ba rejime espesiál,” nia reforsa tan.

Tuir governante ne´e, MESSK depois simu tiha rezultadu husi teste ka ezame ne’ebé kandidatu sira realija ona, 04 dezembru 2019 loke ona prosesu korresaun ba kandidatu sira ne’ebé mak konkorre iha vaga atu tama iha UNTL no IPB. Kandidatu sira ne’e mai husi ESG no ESTV.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here