Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur. Imajen/TATOLI.

DILI, 04 dezembru 2019 (TATOLI)–Komisaun Rekrutamentu Konjunta Ministériu Defeza no Komandu FALINTIL-Forsa Defeza Timor-Leste (F-FDTL) sei distribui tan formuláriu ba suku hotu iha Timor laran tomak, iha tempu badak. 

“Ami mós informa ba Prezidente Repúblika kona-ba prosesu rekrutamentu membru foun F-FDTL ne’ebé sai polémika boot iha suku sira, no mós iha nível nasionál tanba iha protestu barak husi xefe suku sira-ne’ebé kestiona katak tanba saida maka kada suku fahe de’it formuláriu 25, no balun dehan katak formuláriu ne’e la sufisiente tanba suku balun iha joven liu 25. Nune’e, komisaun rekrutamentu sei aumenta formuláriu”, Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur informa asuntu ne’e, hafoin hala’o enkontru semanál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Lere informa katak eseptu Munisípiu Dili mak sei la distribui direta formuláriu ba iha suku sira, maibé husu kandidatu sira atu ba simu direta iha Kuartél Jenerál F-FDTL, Fatuhada.

Kona-ba data fixu ho númeru formuláriu hira mak sei distribui, parte komisaun sei fó sai iha tempu badak.

“Ita sei aumenta tan formuláriu, tanba ita sei simu de’it forsa foun 600. Enkuantu ita aumenta barak liu ita sei lakon tan buat barak–lakon osan, surat tahan, lakon tempu no seluk tan atu halo selesaun”, Lere afirma.

Nia mós fó hanoin katak sira-ne’ebé gosta tatoo nakonu iha isin lolon keta lakon tempu atu mai kompete tanba ne’e la prenxe kritéria no prosesu selesaun ne’e sei rigorozu.

Entretantu, Komisaun Rekrutamentu Konjunta Ministériu Defeza no Komandu FALINTIL-Forsa Defeza Timor-Leste (F-FDTL) hahú loke vaga rekrutamentu ba kandidatu membru F-FDTL foun hamutuk 600, Iha segunda (25/11).

Komisaun ne’e rasik kompostu husi ekipa 13 ne’ebé tun direta ba kada munisípiu, inklui Rejiaun Administrativa Espesiál Oé-Cusse Ambeno (RAEOA) no Postu Administrativu 65 ho suku 450 hodi fahe formuláriu hamutuk rihun 11.000, no kada suku hetan de’it formuláriu 25.

Ho limitasaun formuláriu ne’e, maka antes ne’e Xefe Suku Bairru-Pité, João da Costa Baptista Belo husu ba Komisaun Rekrutamentu atu aumenta formuláriu tanba kada suku fahe vaga 25 la sufisiente atu kobre suku Bairru Pité ho nia aldeia 26.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here