Ministra Finansa ein ezersísiu, Sara Lobo Brites. Imajen/Tatoli Egas Cristovao.

DILI, 04 dezembru 2019 (TATOLI) – Liuhusi reuniaun membru Governu sira ne’ebé prezide hosi Primeiru-Ministru (PM), Taur Matan Ruak, ohin, deside hodi halo redusaun ba proposta Orsamentu Jerál Estadu (OJE) 2020 ho montante biliaun $1.950, liuliu iha kategoria bens no servisu.

Iha soru-mutu ne’e, Xefe Governu orienta Ministériu Finansa, Ministériu Transporte no Komunikasaun, Ministériu Edukasaun, Juventude no Desportu no Prezidénsia Konsellu Ministru atu haree filafali OJE 2020.

“Enkontru ida ohin ne’e, Ministériu Finansa, Ministériu Transporte no Komunikasaun, Ministériu Edukasaun, Juventude no Desportu no Prezidénsia Konsellu Ministru simu knaar ida hosi Primeiru-Ministru para haree filafali orsamentu”, hateten Ministra Finansa, Sara Lobo Brites, ba jornalista sira iha Palásiu Governu, ohin.

Atuál Vise-Ministra Finansa ne’e dehan, Governu deside ona atu hatún orsamentu, maibé ba montante hira maka seidauk bele fó sai tanba sei diskute hamutuk filafali ho ministériu no instituisaun Estadu hotu.

“Hatún konserteza ona, tanba horiseik hothotu akompaña katak Parlamentu nia rejimentu fó dalan para dada fali orsamentu entaun Governu dada no sei pondera paresér Komisaun C nian, ne’ebé ami sei hatama fali orsamentu ho númeru ki’ik más ha’u seidauk bele dehan númeru tanba tenke serbisu hamutuk ho ministériu hothotu”, dehan Sara Lobo.

Kona-ba atu redús iha kategoria bens no servisu, governante ne’e haktuir: “Konserteza katak hatún iha bens no servisu, iha item viajen estranjeiru, fundu rezerva, ami sei hasai hotu no mós item sira seluk ne’ebé maka ami bele hatún entaun tenke hatún”, katak.

Ministra Sara Lobo dehan, bens no servisu montante boot tanba projetu balu maka kontribui, maibé garante katak kuandu elimina maka montante sei tun.

“Projetu ida atu sosa ró-ahi ne’e maka hodi kontribui montante sai boot, tanba projetu sira atu sosa ró-ahi ba fronteira sira ne’e liuhusi forma akordu entre Governu rua, tanba ho akordu ne’e maka ami la tau iha fundu infraestrutura maibé tau iha fundu kontrapartida ne’ebé maka iha bens no servisu”, katak Sara.

Iha proposta OJE ne’ebé Governu retirada husi PN hamutuk biliaun $1,950, fahe ba kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Tuir Livru 1 panorama orsamentál sobre alokasaun orsamentu iha kategoria sasán no servisu hamutuk millaun $703.7 ba tinan 2020, sa’e 55.4% kompara ho alokasaun orsamentu ba kategoria ida ne’e iha OJE 2019. Aumentu iha  2020  ne’e  tamba  atu  hadi’a  povu  nia  moris,  alokasaun  boot  ba  manutensaun  no  operasaun  eletrisidade, no mós ba transporte públiku.

Medida prinsipál sira iha kategoria ne’e   mak: millaun $173.9 iha Ministériu Obra Públika ba mina no manutensaun jeradór eletrisidade iha Hera no Betano. Inklui mós manutensaun ba tranzmisaun eletrisidade (150KW) no sub‐estasaun 20KW. Ida nee inklui torre iha kruzamentu krítiku iha fatin hitu, hanesan N117, N31, N71, N72,N15, N34 no N76. Fornese eletrisidade ba nasaun tomak importante ba dezenvolvimentu no kreximentu ekonómiku, millaun $92.0 iha “Dotasaun ba Governu Tomak” ba fundu kontrapartida. Ida ne’e atu kontinua implementa projetu kontrapartida sira, inklui sosa ró atu halo patrullamentu iha fronteira marítima no sosa ferry Nakroma II.

Millaun $15.0 iha “Dotasaun ba Governu Tomak” ba servisu legál. Orsamentu ida  ne’e atu uza ba servisu legál Estadu nian, millaun $5.5   iha  ”Dotasaun  ba  Governu  Tomak”    hodi  selu  dívida  eletrisidade  (EDTL), millaun  $5.0 iha “Dotasaun ba Governu Tomak” ba servisu aviasaun sivíl, millaun $5.0 iha “Dotasaun ba Governu Tomak” hodi selu ba kuota nu’udar  membru ba instituisaun internasionál  hodi kontinua asegura partisipasaun Timor‐Leste nian  iha atividade nivel rejionál no internasionál.

Millaun $4.9 ba SAMES atu sosa ai-moruk no sasán farmásia nian hodi ajuda hadi’a kualidade servisu saúde públika iha territóriu tomak. Millaun $3.5 ba Ministériu Obra Públika hodi finansia projetu bee no saneamentu iha área rurál no urbana.

Millaun $3.0 iha “Dotasaun ba Governu Tomak” ba sensu populasaun no umakain.  Millaun $2.7 ba Ministériu Finansa hodi suporta reforma Fiskál no Jestaun Finansa Públika (FJFP).  Millaun $2.4 iha “Dotasaun Governu Tomak” ba eventu internasionál no jogu CPLP nian iha Timor‐Leste.

Millaun $2.1 iha GPM ba partisipasaun Timor‐Leste iha Expo Dubai.  Millaun $1.0 iha Ministériu Agrikultura no Peska ba transportasaun produtu lokál no $600,000  ba  Ministériu  Ensinu  Superiór  Siénsia  no  Kultura  hodi  kria  konxiénsia  nutrisaun, luta kontra ki’ak no diversifikasaun ambientál.

Jornalista : Antónia Gusmão

Editora : Maria Auxiliadora

2 KOMENTÁRIU

  1. 2.1 miliaun ba Dubai para atu han no hemu nee lalika ida. 2 miliaun para fo bosu deit ba ema ida nian grupu nee lalika lakon osan tamba povu barak sei iha hela lina kiak nian okos, 2m nee diak liu aumenta tan na iha area edukasaun para hadia kualidade edukasaun iha timor ou fo apoiu ba kbiit laek sira para hakman sira nian terus….

    fo fali ba ema riku sira nee halo saida??? sera kee ema iha dubai nee mak kiak liu ona para fo 2 milliaun nee ba sira para gasta iha neba….

HAKEREK NO HATÁN

Please enter your comment!
Please enter your name here