Diretór Ezekutivu CNC, Hugo Fernandes. Imajen/Antonio Goncalves.

DILI, 04 dezembru 2019 (TATOLI)-CNC (Centro Nacional Chega)! I.P, Da Memória À Esperança asina nota entendimentu ho Universidade da Paz (UNPAZ), Universidade Oriental Timor Lorosa´e (UNITAL) no Universidade Dili (UNDIL) hodi bele hametin kooperasaun di´ak liután iha futuru liuhusi atividade edukativa sira hanesan transmisaun memória, peskiza no mós organiza hamutuk workshop no seminár nasionál no mós internasionál.

“Nota entendimentu asina hodi apoia malu, entre instituisaun ne’ebé iha, rekomendasaun Chega no rekomendasaun CAVR ni’an barak la halimar; se husik de’it mesak ba Centro Chega mak atu implementa, ami hanoin ami-nia kbiit la to’o, entuan Centro Chega agradese ba vontade di’ak husi universitária sira para depois bele koopera ho Centro Chega hodi implementa rekomendasaun sira ne’e,” hateten Diretór CNC, Hugo Maria Fernandes ba jornalista sira liuhusi Konferensia Imprensa, iha Salaun CNC, Balide, ohin.

“Klaru rekomendasaun sira barak la halimar maibé hanoin koko atu responde ba rekomendasaun sira, iha ámbitu prezervasaun memória pasada nian. Bainhira ita ko’alia kona-ba prezervasaun memória pasada ita ko’alia kona-ba oinsá kontinua introdus ita-nia memória pasada ne’e iha setór edukasaun liuliu liuhusi peskiza, liuhusi konferénsia apoiu ne’ebé universidade sira sei fó mai Centro Chega”.

Liuliu, tuir ezekutivu ne´e, atu asegura katak jerasaun foun sira ne’ebé maka moris depois 1999 estatistikamente hatudu katak ita iha mais 12.000.000 jerasaun ne’ebé moris iha depois 1999, karik la iha relasaun emosionál, relasaun istória ho ita-nia pasadu,  husi biban ida ne’e ita hein katak sira ne’ebé agora tama ona ba idade universidade, eskola sira, sira bele kontinua hetan koñesimentu kona-ba ita-nia istória pasada nian.

Diretór Hugo Maria Fernandes hatutan, alende parseira ne’e hein katak bele tulun hametin instituisaun sira.”Centro chega ami menus iha rekursu umanu, maibé iha komunidade akadémika sira, rekursu humanu barak la halimar, entaun oinsá instituisaun sira bele apoiu malu, em termos de oinsá ita prezerva hamutuk ita-nia memória pasada, introdus nu’udar lisaun ba jerasaun foun sira,” nia akresenta.

Nia reforsa, parseira ida ne’e atu fahe rekursu umanu ba malu. Ezemplu, Centro Chega iha apoiu finanseiru oituan ne’ebé bele hatutan ba iha atividade akadémika sira no mós rekursu  em termos de iha sentru ne’e rasik, ita iha arkivu rihun ba rihun mais 30.000 arkivu iha ne’e ne’ebé mak nakloke ba dosente sira, nakloke ba estudante sira, depois bele uza atu halo peskiza ba sira-nia monografia, teze ka halo peskiza para depois hariku ita-nia mundu litararia iha Timor-Leste.

“Ita atu halo balansu ba narativa istória, se lae narativa istória ita-nia ne’e maun boot no bin bo’ot sira-nia istória mak iha, ema baibain nia istória la iha, entaun ida ne’e intensaun husi parseira ida ne’e fahe rekursu ba malu fó hametin instituisaun idaidak nian maibé importante liu mak asegura katak jerasaun foun sira aprende  husi ita-nia pasadu,”  esplika Diretór CNC.

Notísia relevante:CNC Introdús Rekomendasaun CAVR “Chega!” Ba Estudante UNITAL

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here