Defisiente sira bainhira hatudu sira nia talentu iha desportu liuhusi komemorasaun Loron Mundiál ba Ema ho Defisiénsia ne’ebé hala’o iha Palásiu Prezidente Nicolau Lobato, segunda ne’e. Imajen Mídia PR

DILI, 03 dezembru 2019 (TATOLI)- Sekretária Estadu Igualidade no Inkluzaun (SEIK), Maria José da Fonseca Monteiro hateten, hahú primeiru governasaun to´o agora, iha ita-nia konstituisaun ko´alia ona katak tenke trata ema hotu hanesan no inklui ba iha dezenvolvimentu.

Sekretária Estadu Igualdade no Inkluzaun, Maria Jose da Fonseca Monteiro de Jesus. Imajen António Goncalves

“Bainhira ko´alia kona-ba inklui ema hotu iha dezenvolvimentu liuliu ema ho defisiénsia sira, tenke inklui sira hahú hosi konsultasaun, halo planu sira, ida ne’e tenke rona mós ita-nia maluk sira ho defisiénsia nia opiniaun no hanoin ba prosesu dezenvolvimentu ida,” hateten SEIK, Maria José da Fonseca Monteiro iha ámbitu komemorasaun loron múndial ema ho defisiénsia iha Sentru Konvensaun Dili (CCD), ohin.

Nune’e, Sekretária Estadu ne’e husu atu sidadaun defisiénsia sira ejize sira-nia partisipasaun iha prosesu dezenvolvimentu ba programa ruma.

“Ha´u-nia maluk sira se iha programa ruma karik la’ós ita bo’ot sira atu simu ida prontu ona maibé ejize mós atu konta ho ita bo’ot sira-nia partisipasaun dezde prosesu inísiu,” tenik SEAK.

Governante ne’e mós fó hanoin ba sidadaun sira kona-ba dever legál ne’ebé estadu Timor-Leste (TL) rasik kria hodi proteje sidadaun sira ho defisiénsia.

“Estadu iha dever legál atu respeita, atu proteje no atu hakonu direitu sidadaun sira nian. Iha kontestu ohin ita ko´alia ne’e kona-ba direitu ema ho defisiénsia, liuhosi planu no programa ne’ebé governu kria”.

Iha biban hanesan, SEIK Maria José da Fonseca Monteiro ne’e mós husu atu sidadaun hotu respeita ema idaidak nia direitu liuliu ema ho defisiénsia.

“Hanesan umanu ita iha dever morál atu respeita ema idaidak nia direitu. Dalaruma ita ezije barak liu ba estadu atu respeita ita-nia direitu maibé ita haluhan  tiha katak ita mós iha responsabilidade morál atu  respeita ita-nia maluk sira-nia direitu, liuliu ita-nia belun sira ho defisiénsia,” nia sujere.

Jornalista: Nelia Borges

Editór     : Rafy Belo

HAKEREK NO HATÁN

Please enter your comment!
Please enter your name here