Responsável Kompañia NPM Industries Unipesoal, Lda iha Kolam Masin Manatuto, Sérgio da Costa dos Santos. Imajen/Joanico de Araújo

MANATUTO, 03 dezembru 2019 (TATOLI) – Kompañia NPM Industries Unipesoal, Lda, ne’ebé maka prodús Masin ho marka Sal do Mar de Timor-Leste, kada loron prodús iha Kolam Masin Manatuto no halo embalajen iha Suku Ulmera, Postu Administrativu Bazartete, Munisípiu Liquiçá.

Responsável kompañia, Sérgio da Costa dos Santos, informa kada loron produsaun iha meza ida bele hetan kilograma 500.

“Loron ida ita bele panen hotu iha meza hamutuk 62 no husi meza ne’e bainhira ita konta kasar bele hetan to’o tonelada 30 ka 40”, tenik ba Agência Tatoli iha Kolam Masin Manatuto, tersa ne’e.

Nia dehan, iha fatin prosesamentu masin ne’e, la konta pur embalajen maibé konta pur tonelada ne’ebé kliente sira foti nokada kliente ne’ebé mai ho karreta bele lori tonelada neen ba ninia fatin.

“Husi ne’e ami lori ba Ulmera tanba fábrika hodi falun iha ne’ebá no sei koko tama laboratorium hafoin bele distribui ba loja sira”, nia akresenta.

Sérgio akresenta, iha Dili laran kompañia ne’e hatama ona produtu masin ba loja sira hotu.

Nia informa tan, traballadór ne’ebé serbisu iha fatin prosesamentu hamutuk na’in-neen.

“Difikuldade ba traballadór durante halo produsaun masin mak bee, uza transporte hosi kompañia no ahi ba kalan iha fatin prosesamentu”, nia dehan tan.

Nia haktuir, fatin prosesamentu ne’ebé hahú atividade iha 2015, iha fulan-maiu to’o dezembru tenke para prosesa tanb iha fulan ne’e maka udan tun.

Kona-ba konsumu masin iha rai-laran, NPM Industries kada loron fa’an masin tonelada neen ka hitu no distribuisaun ba territóriu kuaze tonelada 500 to’o 600.

Masin ne’e fa’an embalajen ida sentimu ualu no  kaixa ida ho presu $8, iha pakote 50 iha laran.

Alende ne’e, kada fulan kompañia NMP Industries esporta masin tonelada 24 ba Singapura, ne’ebé atividade ne’e hahú iha fevereiru 2017.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here