Diretór Jerál Protesaun Sivíl, Superientendente Asistente Polísia, Ismael da Costa Babo. Imajen/MI

DILI, 03 dezembru 2019 (TATOLI)-Diretór Jerál Protesaun Sivíl, Superintendente Asistente Polisia, Ismael da Costa Babo, husu ba Funsionáriu Públiku foun nain 16 hosi Diresaun Nasional Prevensaun Konflitu Komunitária (DNPKK) ne’ebé tuir formasaun  kona-ba prevensaun no rezolusaun konflitu, direitus umanu no perspetiva jéneru nian tenke hala’o servisu ho neutru bainhira sai mediadór ba disputa ruma iha povu nia leet.

Ismael Babo afirma lia hirak  iha abertura formasaun ba mediadór DNPKK munisípiu 12 ne’ebé hala’o iha salaun Ministériu Interiór, ohin. Formasaun ne’e resik sei hala’o durante loron haat; hahú segunda to’o kinta (02-05/12/2019).

“Ita boot sira hanesan mediadór reprezenta Governu no Estadu ida ne’e iha populasaun sira-nia leet tenke sai pesoál ne’ebé neutru, kuandu atu halo mediasaun ba problema,” afirma Ismael Babo liuhosi komunikadu imprensa hosi Servisu Protesaun Sivíl.

Ismael Babo esplika, karater populasaun TL la’ós violentu, maibé situasaun mak obriga karater ne’e bele forma.  Joven sira uza nafatin karater violentu beibeik iha sosiedade, populasaun sira-nia leet no violentu ne’ebé akontese iha TL bele konsidera mais sériu ne’ebé iha impaktu mós ba dezenvolvimentu.

Ismael husu atu funsionáriu no mediadór sira atu bele hasoru situasaun reál iha terrenu hodi solusiona problema ne’ebé sosiedade sira hasoru bele kria hikas dame iha sosiedade sira nia moris.

Sekretáriu Estadu Protesaun Sivíl (SEPS), Alexandrino de Araújo, rasik nia mensajen ba funsionáriu DNPKK ne’ebé servisu hanesan mediadór tenke sai pesoál ne’ebé  kriativu no ativu koordena ho autoridade suku, polisia no povu sira ne’ebé envolve iha konflitu tenke moris hakmatek hodi kontribui dezenvolvimentu nasaun ne’e.

Formasaun ne’e partisipa mós hosi Diretór DNPKK, António Viegas, Xefe Departamentu Prevensaun Konflitu, Martinho Carvalho Sarmento no fasilitadór ONG ba Futuru, Vidal Campus.

Jornalista : Eugénio Pereira

Editór       : Francisco Simões

1 KOMENTÁRIU

  1. Sira so bele neutru bainhira la envolve iha grupu ruma. Karik maka envolve ona iha grupu, imposivel atu sira neutru iha sira-nia knaar!

HAKEREK NO HATÁN

Please enter your comment!
Please enter your name here