Ambiente diskusaun jeneralidade OJE 2020 iha PN. Imajen Tatoli/Egas Cristóvão

DILI, 03 dezembru 2019 (TATOLI)—Bankada Governu no Opozisaun hanesan KHUNTO, PLP, CNRT, FRETILIN no PD, propoin haruka fila Orsamentu Jerál Estadu (OJE) 2020 ba Governu atu halo armonizasaun.

“KHUNTO husu Primeiru-Ministru, karik bele dada hikas proposta tinan fiskál 2020 nian hafoin lori hikas mai Parlamentu”, Deputadu António Verdiál, ko’alia liuhosi plenária Parlamentu Nasionál, tersa ne’e.

Aleinde ne’e, deputadu PLP, Noé da Silva Ximenes, husu hadi’a proposta ne’e nune’e foti osan hosi bens serbisu no tranferénsia públika tenke tau iha kapitál dezenvolvimentu.

“Se ita dehan povu ne’e halerik ba estrada, bee-moos no eletrisidade, entaun osan ida-ne’e tenke tau iha nia fatin, nune’e proposta ne’e labele mosu tan ilegál no inkonstitusionál. Ami husu karik Governu bele pondera fila-fali depois lori fali mai”, deputadu PLP ne’e fó hanoin.

Iha parte seluk, Deputadu Partidu Demokrátiku (PD), Mariano Assanami ‘Sabino’ propoin kria grupu traballu atu haree filafali orsamentu.

“Presiza kria grupu traballu hadi’a filafali depois lori fali mai ita diskute,” Assanami fó hanoin.

Entretantu, Deputada Bankada FRETILIN, Maria Angélica Rangel hateten presiza hadi’a fali proposta orsamentu 2020.

“Haruka fila ba Governu hadi’a tanba la prenxe estrutura, legál, konstitusionál no formál. Atu hadi’a ne’e, kompeténsia Governu nian tuir konstituisaun artigu 115 hodi halo reformulasaun”, deputada Maria Angélica tenik.

Iha sorin seluk, Xefe Bankada CNRT, Duarte Nunes, akresenta CNRT nia hakarak iha ona relatóriu kada komisaun nian.

“Ami entrega tomak ba Primeiru-Ministru. Ne’e ita-nia kompeténsia tomak foti desizaun. Ami hein de’it desizaun”, Duarte informa.

Iha parte seluk, Prezidente Parlamentu Nasionál, Arão Noé de Jesus da Costa Amaral, hateten iha opsaun rua atu fó filafali depois konsulta ho legál sira laiha dalan.

“Ita devolve de’it maibé tenke liuhosi asaun votasaun ida. Só votasaun ne’e mak anula tuir artigu 92 númeru 2. Lei ne’e labele aprezentra fali dentru lejizlativu ida-ne’e. Hahú 15 setembru foin bele. Ida-ne’e razaun fundamentál”, Arão Noé esplika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here