Vise Ministru ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen: TATOLI

DILI, 02 dezembru 2019 (TATOLI)-Ministériu Saúde (MS) sei koloka pesoál saúde 40% ba sentru saúde sira ne’ebé mak menus atendimentu ba komunidade.

“Iha tinan-2019 ita rekruta 320 vagas maibé ita hatene teste ida ne’e liuhusi sistema dijitál ne’ebé 60% ita konklui maibé ita sei iha 40% ita presiza reanunsiu fali hodi koloka ba postu saúde sira ne’ebé mak menus pesoál saúde hodi halo atendimentu ba komunidade,” informa Vise-Ministru Dezenvolvimentu Estratéjiku Saúde, Bonifácio Maucoli dos Reis ba media iha uma fukun Parlamentu Nasionál (PN), ohin.

Governante ne´e hateten, ita hatene pesoál saúde sira ne’ebé mak iha sentru saúde sira mínimu no atendimentu mós menus tanba ida ne’e mak sei koloka profisionál saúde ba sentru saúde sira hotu.

“Iha postu saúde sira ne’ebé konstrusaun hahú iha Governu dahuluk nian too iha Governu daualuk nian hamutuk 293 no hela atus ida resin mak agora planu hela atu konstrui no tinan ida ne’e ita hakarak konstrui 50 postu saúde inklui rezidénsia maibé depende ba orsamentu ida ne’e hetan aprovasaun ka lae tanba sei iha diskusaun nia laran,” informa  Vise-Ministru Maucoli.

Nia esplika, médiku sira ne’ebé mak la ba halo sira-nia kna’ar iha postu saúde ne’e idaidak nia karakter maibé ita rekruta sira iha ne’ebá hateten klaru ona katak prontu atu koloka iha ne’ebé de’it maibé ita koloka tiha ba buka razaun katak kestaun família entaun sira abandona servisu.

Alende, Tuir Vise-Ministru Dezenvolvimentu Estratéjiku Saúde, Bonifácio Maucoli dos Reis katak iha tinan ida ne’e MS sei foti asaun rigoroza ba sira para hodi halo re-alokasaun se mak la kumpri ita hatene tanba agora dadaun médiku barak mak iha rai li´ur hela no sira ne’ebé mak indisiplinadu ita sei hasai sira.

“Ita rekruta profisionál saúde foun para troka fali sira ne’ebé mak la iha espiritu nasionalizmu, patriotrizmu atu bele serbi di’ak ba ita-nia komunidade,” nia konklui.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here