IOB

DILI, 02 dezembru 2019 (TATOLI) – Ensinu superiór privadu, IOB (Institute of Bussiness) halo investimentu ba rekursu umanu inkluzivamente dosente sira hodi hasa´e kualidade pesoál no reforsa dezenvolvimentu institusionál hodi garante kualidade edukasaun.

Magnifíku Reitór IOB, Augostu da Conceição Soares hateten katak durante nia mandatu, investe barak ba iha formasaun formál no naun-formál dosente sira nian hodi bele hasa´e kualidade dosente sira nian hodi reforsa ensinu no aprendijazen ba estudante sira.

“Dosente sira ne’ebé foti ona maestradu tenke kontinua doutoramentu, sira ne’ebé lisensiatura tenke foti tan maestradu,” informa Reitór Augostu da Conceição Soares ba Ajénsia TATOLI, iha nia kna´ar fatin, Kampus IOB Fomentu, Dili, segunda (02/12/2019).

Autoridade másimu IOB ne´e akresenta, oportunidade formasaun ne’ebé IOB fó ba dosente sira ne’e iha área espesializada. IOB la haruka dosente atu kursu tuir idaidak nia hakarak tanba IOB konsidera rekursu umanu iha intituisaun ensinu superiór ida importate tebes hodi nune’e bele garante kualidade instituisaun nian ba futuru.

“Ita haruka sira halo peskiza mak barak tanba kna’ar ou papel dosente nian presiza asumi mak hanorin, peskiza no servisu komunitária, ida ne’e mak sai indikadór ida atu eleva kualidade instituisaun nian,” tenik reitór.

Iha tinan letivu 2020, tuir Reitór IOB, Augusto da Conceição Soares katak hanorin, peskiza no servisu komunitária sai asuntu importante no prinsipál ba dosente sira hotu atu implementa iha estabelesimentu ensinu superiór privadu ne´e atu implementa. Ho razaun ida ne´e, IOB, em termos de fasilidade no ekipamentu hahú hadi´a nia aan daudaun ona atu nune´e bele hakbesik liután sosiedade ba IOB.

Tan ne’e IOB presiza liután fó atensaun ba formasaun iha área edukasaun formál no naun-formál hodi garante funsionamentu institusionál nian iha prosesu akadémiku nian hodi nune’e IOB mós bele hetan kualidade ida di´ak liután iha tinan sira tuir mai.

Jornalista :Tomé Amado

Editór     : Rafy Belo

HAKEREK NO HATÁN

Please enter your comment!
Please enter your name here