Primeiru-Ministru aprezenta programa Governu, liuhusi Orsamentu Jerál Estadu 2020 iha Parlamentu Nasionál. Imajen/ Egas Cristovao.

DILI, 02 dezembru 2019 (TATOLI) – Primeiru-Ministru (PM), Taur Matan Ruak, hateten Governu propoen ba Parlamentu Nasionál (PN) atu aloka millaun $317-resin hodi investe ba mellora konetividade nasionál, liuliu ba dezenvolvimentu infraestrutura.

“Governu husu Parlamentu atu aloka US$317,686.517 hodi investe iha dezenvolvimentu infraestrutura maka hanesan programa estrada no ponte sira; setór eletrisidade; governasaun eletrónika; projetu Tasi-Mane; nune’e mós programa infraestrutura sira seluk husi área saúde, edukasaun, seguransa no defeza nian, no mós sistema apoiu finanseiru nian ida ba dezenvolvimentu urbanu no rurál”, Xefe Ezekutivu afirma iha debate proposta Orsamentu Jerál Estadu (OJE) 2020 iha PN, ohin.

Objetivu sira husi medida foun iha área sira-ne’e maka atu fasilita mós realizasaun investimentu sira husi setór privadu no kriasaun empregu, atu apoia setór agríkola, hanesan fó subsídiu ba transporte produtu agríkola lokál sira, ba kooperativa no ba inisiativa sira ne’ebé buka atu kria empregu ba aan rasik, liuliu husi grupu feto sira ne’ebé hela iha área rurál.

PM adianta ba promosaun konetividade nian, Governu ne’e propoin atu investe mós iha akizisaun “Nakroma 2” no “Ró Barkasa”, hodi fasilita transporte marítimu iha territóriu nasionál, iha akizisaun autokarru sira hodi asegura ezisténsia transporte koletivu públiku no iha estímulu ba oferta foun sira husi prestasaun servisu aviasaun sivíl nian.

Eis Prezidente Repúblika ne’e salienta Governu kontinua investe kona-ba setór primáriu, ne’ebé okupa 70% resin husi populasaun timorense, Governu ne’e hakarak foka ninia asaun, la’ós de’it, iha agrikultura, maibé mós iha transporte, distribuisaun, embalajen no armazenamentu produtu agríkola, peskeiru ka florestál sira-nian.

Iha setór sekundáriu nian, Governu ne’e propoin atu estabelese Parseria Públiku-Privada (PPP’s) ba dezenvolvimentu indústria petrolífera nasionál nian, nune’e mós ba dezenvolvimentu indústria estrativa ida. Governu ne’e hakarak investe iha apoiu ba dezenvolvimentu no expansaun setór turizmu no finansa.

Entretantu tuir dadus ne’ebé TATOLI asesu hatudu katak iha 2019, MOP kontinua esforsu atu kompleta tiha estrada nasionál sira “ring road”.

Kontinua reabilita no halo manutensaun liuhosi Programa Estrada Rurál nune’e selebra kontratu pakote hamutuk 68 (Reabilitasaun 65,25 KM; Manutensaun Periódika 215,70 KM; no Manutensaun Rutina 300,10 KM).

Estrada Nasionál, hamutuk trosu ka sesaun 13 ho nia naruk 419 KM, iha 2018, konsege de’it hetan progresu atuál hamutuk 36,25%, no iha tinan 2019 progresu atuál hetan hamutuk 71,39%, signifika katak halo servisu signifikante tebes ho taxa 35% progresu atuál.

Iha 2019, etermu tempu ezekusaun lais liu ho taxa 3,77% (igual 40 dias) se kompara ho ezekusaun 2018 ne’ebé PMU sei emprega ema internasionál na’in-ualu, maibé iha 2019, MOP halo reforma tau timoroan tékniku na’in-sia hodi superviziona no halo kontrolu ba kualidade trosu nasionál sira ne’e.

Estudu no dezeñu ba estrada munisípiu no urbana (Maliana), la’o hela hamutuk trosu 12, ho naruk 247,70 KM, Estudu no dezeñu ba ponte hamutuk 10 ho naruk 740 M no kontinua responde ba manutensaun estrada urbana.

Konkursu promove setór privadu ba konkursu ERD (Estrada Rural ba Dezenvolvimentu) partisipa no atribuidu ba kompañia, lokaliza iha kada munisípiu kompañia na’in husi feto 30% no ho defisiénsia 7% sai manán na’in.

Lansamentu ba konstrusaun estrada nasionál Baucau-Viquque ho distánsia 60KM, no Laulara-Solerema distánsia 28.5KM no lansamentu ba estrada munisipál Aipelu-Bazartete ho distánsia 13.5KM no Ermera-Fatubessi ho distánsa 11.81KM.

Kompleta konstrusaun auto estrada Suai, ponte Hinode, ponte BJ. Habibie no teste ba implementa téknolojia Geo-Gell ba estrada rurál iha suku Namanei, postu administrativu Laga, munisípiu Baucau husi JICA.

Membru komisaun interministeriál ba dezenvolvimentu Aeroportu Internasionál Nicolau Lobato, Kumoro, inklui konstrusaun Portu Baia Tibar.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here