Xefe Bankada UDT, Francisco David Xavier Carlos. Imajen Tatoli/Egas Cristovão.

DILI, 02 dezembru 2019 (TATOLI)–Sekretáriu Jerál UDT, Francisco David Xavier Carlos, ofisialmente substitui Deputadu Saudozu Gilman Exposto dos Santos ne’ebé hakotu iis iha semana kotuk, hafoin sofre moras fuan.

Proposta substituisaun ne’e lee husi Sekretária Meza Parlamentu Nasionál (PN), Maria Terezinha Viegas, ne’ebé aprezenta husi Prezidente Bankada Partidu União Democrática Timorense (UDT)/Frenti-Mudança (FM), Isabel Ximenes, iha loron 2 fulan ne’e, molok abertura diskusaun Orsamentu Jerál Estadu (OJE) tinan 2020.

Iha proposta ne’e, bankada UDT-FM husu Prezidente Parlamentu Nasionál, Arão Noé de Jesus da Costa Amaral ho deputadu sira hotu kona-ba substituisaun ba deputadu Saudozu Gilman Assunção Exposto dos Santos.

“Liuhusi karta ida-ne’e, hakarak husu ba Prezidente Parlamentu Nasionál Arão katak ami-nia deputadu Gilman Exposto dos Santos fila hikas ona ba Aman Maromak Nia Kadunan Santu, nune’e labele hala’o knaar hanesan baibain. Tan ne’e, bankada UDT-FM hakarak submete pedidu ne’e atu substitui ho Francisco David Xavier Carlos, hodi hala’o knaar nu’udár deputadu tuir lei haruka”, haktuir husi pedidu ne’ebé lee husi Sekretária Meza, Terezinha Viegas.

Iha oportunidade ne’e, Deputadu Bankada FRETILIN, Joaquim dos Santos husu ba Prezidente PN atu esplika kona-ba substánsia substituisaun ne’e katak permanente ka provizóriu.

Nia dehan, bainhira substituisaun ne’e permanente, nia husu atu halo serimónia pose ba deputadu Francisco David Xavier Carlos.

Kona-ba kestaun ne’e, Prezidente PN Arão Noé hateten deputadu barak mak mate durante ne’e no deputadu sira iha PN akompaña prosesu tomak, tanba ne’e sei laiha serimónia pose.

Nune’e mós, molok diskursu, Primeiru-Ministru, Taur Matan Ruak hato’o saudasaun ba deputadu foun Francisco David Xavier Carlos ne’ebé ofisialmente substitui deputadu Saudozu Gilman Exposto.

“Ha’u lori VIII Governu nia naran no ha’u-nia naran rasik, hato’o profunda sentidu pézames ba deputadu Gilman Exposto nia mate ne’ebé króniku tebes. Ha’u mós hato’o saudasaun ba Deputadu Francisco David Xavier Carlos husi bankada UDT-FM”, PM Taur informa.

Entretantu, Deputadu Saudozu Gilman Assunção Exposto dos Santos hakotu iis iha loron 26 novembru 2019, tanba sofre moras fuan.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here