DILI, 29 novembru 2019 (TATOLI)-Instituisaun akadémika privada, Universidade Dili (UNDIL), tuir planu tinan ne’e sei fó graduasaun ba estudante finalista husi fakuldade neen  purvolta 603.

“Totál estudante sira ne’ebé atu halo graduasaun iha tinan ida ne’e 603, kompostu husi fakuldade neen ho departamentu sira hanesan Dentária, Enfermajen, Saúde Públika. Estudante sira ne’e mak prepara ona,” hateten Reitór UNDIL, José Agostinho da Costa Belo Pereira ba Ajénsia TATOLI iha nia kna’ar fatin kampus UNDIL, Mascarenhas, Dili, sesta (29/11/2019).

Nia informa, tinan ida ne’e UNDIL sei halo graduasaun ba  estudante husi fakuldade neen no tuir planu sei realiza iha dezembru ne´e. “Prosesu ne’e iha ona Ministériu Ensinu Superiór para verifika ikus, tenke iha despaxu ida atu sira tuir graduasaun”.

Iha fatin hanesan, Reitór UNDIL hateten, husi dia 1 ba leten sei halo prosesu judisium. “Iha akademika ne’e judísiu importante tebes para ita bele hatene prosesu ne’e nia kompletu ona ka lae, nia teze ne’e iha duni ka lae. Prosesu tomak ne’e iha prosesu ida bolu dehan judisium ne’e”.

“Agora ida graduasaun ne’e hanesan formaliza de’it, tanba ne’e agora dadauk sira konsentra hela oinsa atu halo judisiu, para hatene loloos administrasaun ne’e los ka lae ema-nia prosesu tomak ne’e kompletu ka lae,” hateten Reitór José Agostinho.

Nia reforsa, se estudante iha ona judísiu ne’e katak sira lisensiatura ona.”Agora presiza inan-aman sira haree, tanba ne’e ita sei halo graduasaun iha 14 dezembru”.

Reitór UNDIL informa tan, Fakuldade neen iha departamentu hotu iha graduasaun. “Iha Fakuldade Ekonomia iha departamentu rua, Kontabilidade ho Jestaun, Edukasaun, iha departamentu Inglés,  Saúde Públika iha Dentária, Enfermajen, sira ne’e kuaze tuir hotu”.

“Iha judísiu komesa dia 1 kada fakuldade ida iha 1 até tempu ne’ebé determina tanba ita-nia fatin troka malu no oinsá para bele iha liu biban ba fundasaun ba dosente sira, data ne’e sei kompletu komesa husi dia 1 ba leten,” katak reitór.

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here