Saskia Kouwenberg hasai imajen hamutuk ho joventude Timor-oan sira hafoin simu medalla Orden Colar Timor-Leste iha ámbitu selebrasaun festa Proklamasaun Independensía ba dala-44 iha Palacio do Governo, kinta (28/11/2019). Imajen/Domingos Piedade

DILI, 28 novembru 2019 (TATOLI) – Ativista Saskia Kouwenberg, kontente no onradu tebes ho Estadu Timor-Leste ba medalla orden Grande Colar ne’ebé mak oferese ba nia.

Notísia Relevante : Estadu Kondekora Sidadaun Na’in-71

Saskia Kouwenberg. Imajen/Domingos Piedade

“Ha’u sente onradu tebes no emosionál tebes tanba bele hetan medalla oden Grande Colar hosi estadu Timor-Leste,” hateten Saskia Kouwenberg ba Ajénsia TATOLI, ohin, bainhira partisipa iha selebrasaun festa proklamasaun independénsia ba dala-44 (28 novembru 1975-28 novembru 2019) iha Palacio do Governo.

Saskia Kouwenberg nu’udar ativista ne’ebé kontribui ba prosesu luta libertasaun Timor-Leste nian, ne’ebé nia mak lori sai kasete gravasaun Masakre Santa Krús, 12 novembru 1991 ba iha rai li’ur hodi públika ba mundu kona-ba masakre asasinatu nee.

Iha 1991, Saskia Kouwenberg nu’udar ativista ida no mós servisu nu’udar freelance journalist ida hosi Olanda. Nia mak simu kasete gravasaun filmajen Masakre Santa Krús hosi jornalista Max Sthall hodi públika iha ba mundu kona-ba Timor-Leste nia situasaun.

“Ha’u hanoin liu tiha loron balun, depois de Masakre Santa Krús, kuandu militár Indonézia sira la observa ona semitériu mak maluk jornalista Max Stahll ba foti kasete ne’ebé nia rasik hakoi iha rate hodi lori sai hosi semitériu,” nia haktuir.

Nia hatutan, momentu ne’ebá jornalista Max Sthall rona katak nia parte atu ba rai li’ur, entaun Max Sthall fó tuir kasete ne’e, hodi bele fó sai iha rai li’ur.

Saskia esplika maneira ne’ebé mak atu lori sai no salva kasete hosi militár Indonézia sira mak suku tiha bolsu ida iha roupa laran, atu nune’e lalika identifika hosi forsa Indonézia sira iha fatin públiku sira hanesan iha aeroportu.

“Ha’u suku tiha bolsu ida iha roupa laran mak tau kasete ne’e iha laran ida fatin tuur nian, hafoin kose tiha animal nia ran atu prevene hosi pasa revista hosi militár Indonézia, nune’e sira bele dehan softek,” Saskia konta tuir.

Ho meiu ne’ebé mak nia parte halo, ikus mai nia konsege pasa revista oi-oin Dili, Kupaun, Bali, Jakarta no too iha Amisterdam. Nune’e nia públika duni ba iha mundu tomak, to’o mundu hatene kona-ba situasaun aktu kontra umanidade hosi Indonézia sira ba Timoroan iha Timor.

Iha biban hanesan, Prezidente Repúblika, Francisco Guterres “Lú Olo” hateten, ohin mós Prezidente Repúblika ho Estadu Timor-Leste nia naran, investe ita-nia belun estranjeira ida, jornalista no ativista Saskia Kouwenberg, ne’ebé eis-Prezidente Taur Matan Ruak dekreta tiha ona iha 2017 ho Medalla Orden Timor-Leste, nu’udar rekoñesimentu ba nia hahalok brane lori-sai kasete kona-ba Masakre Santa Krús ba rai-li’ur no fó apoiu ba povu Timor nia luta libertasaun nasionál.

“Ho ajuda hosi belun Saskia, imajen sira ne’e konsege lori sai ba rai li’ur no fanun mundu tomak ba realidade ne’ebé akontese iha ita-nia rai,” PR Lú Olo hateten.

Prezidente interinu ba Komisaun Omenajen Polítika, Custodio Belo ‘Alin Laek’ fó sasin katak, Saskia Kouwenberg merese duni hetan medalla orden Timor-Leste tanba nu’udar feto ida ne’ebé mak barani tebetebes hodi lori sai kasete 12 de Novembru 1991 ba iha rai li’ur liuhosi invazór sira ninia seguransa hanesan aeroportu sira.

“Ha’u hanoin Saskia Kouwenberg merese duni hetan medalla orden Timor-Leste no agradese tebes tanba ho nia mak mundu nia matan nakloke ba Timor nia terus no halerik” Alin Laek hateten.

Jornalista : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here