Diretór Eskola Sekundária Tekníka Vokasionál-Grupu Teknolojia Indústria (ESTV-GTI) Bekora, Francisco Guterres.

DILI, 27 novembru 2019 (TATOLI)—Diretór Eskola Sekundária Tékniku Vokasionál-Grupu Teknolojia Indústria (ESTV-GTI) Becora, Fransisco Guterres, hateten parte eskola husu Ministériu Edukasaun, Juventude no Desportu (MEJD) iha 2020 tau osan uitoan ba iha manutensaun na ekipamentu sira para eskola tékniku sira bele dezenvolve nia aan.

“Ami husu ba Ministériu Edukasaun atu tau osan ba iha manutensaun para bele kompleta mós ekipamentu sira ne’ebé iha Eskola Sekundária Tékniku Vokasionál sira ne’ebé iha ona no sira ne’ebé seidauk iha. Se laiha osan ba manutensaun ne’e susar tebes,” dehan Diretór ESTV-GTI, Becora, Fransisco Guterres, ba Ajénsia TATOLI liuhusi entrevista iha nia knaar fatin, Becora, kuarta (27/11/2019).

Nia informa, ESTV-GTI Becora iha osan uitoan maibé ekipamentu sira ne’ebé Governu Korea fó la kompletu, ne’ebé uluk MEJD halo akordu ho Governu Korea liuhusi Ajénsia KOICA (Ajénsia Kooperasaun Internasionál Korea, sigla inglés) ne’e iha fundu partida hamutuk millaun ida (1).

“Ne’e foin dadauk, sira fó $300 ratus juta mai iha eskola tékniku vokasionál ne’e, ami hasai osan juta atus ida hodi uza ba halo kompleta ekipamentu sira iha ofisina, departamentu neen iha sala teória monta CCVT hadulas iha fatin sira, tanba foti osan fundu kontra partida ne’ebé tama iha konta bankária. Diferensa ho eskola tékniku sira seluk, tanba sira la iha fundu,” nia informa.

Diretór ESTV-GTI ne’e akresenta, iha Orsamentu Jerál Estadu (OJE) 2020, nia husu ba Governu liuliu MEJD atu tau osan oituan ba iha manutensaun. Tanba, nia dehan, ESTV-GTI Becora ninia fatin sira ba hala’o prátika ba komputadór no seluk tan ne’e kompletu ho AC (Ar Condicionado) hodi asegura ekipamentu hirak ne’e di’ak nafatin.

“Kuandu AC ita la halo manutensaun, nia aat ona. Ba fali iha komputadór sira ne’ebé departamentu ne’en ne’e, ida mak seidauk iha multimedia mak mekánika automóvel. Maibé, seluk ne’e iha laboratóriu multimedia ni’an ho prátika. Komputadór 40 iha departamentu ne’en ne’e iha hotu, entaun ita presiza tenke tau fundu ba manutensaun,” nia hateten.

Tanba, nia dehan, aplika sistema modular sei sai nu’udar dezafiu tanba parte eskola koko atu hadi’a kualidade liuhusi asegura ekipamentu hodi fasilita no forma rekursu umanu ne’ebé di’ak no iha responsabilidade ba matenek ne’ebé sira hetan iha eskola.

“Jestaun ekipamentus sira ne’e importante. Agora ninia obstákulu ne’ebé eskola tékniku sira hasoru ne’e mak fundu Ministériu Edukasaun atu tau ba halo manutensaun ne’e laiha. Fundu sira ne’ebé atu tulun eskola atu jere no bele hasa’e rekursu ne’e seidauk iha,” nia haklaken.

Ezemplu, nia hatutan, ekipamentu sira depedente de’it ba Ministériu Edukasaun ne’e paradu hotu. Tanba fundu ida ne’ebé Ministériu Edukasaun fó mai eskola hanesan subsídiu eskolár, ne’e la’ós uza ba atu halo prátika. Subsidiu eskolár mai atu uza fali ba buat administrasaun.

“Tanba ne’e maka eskola ESTV-GTI durante ne’e uza meius ida halo planu no programa, depois konvida inan-aman mai atu aprezenta sira-nia programa. Bainhira ninia dezafiu iha mak inan-aman sira fó solusaun mak liuhusi inan-aman nia kontribuisaun. Tanba iha ne’e mak prátika la’o,” nia esplika.

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here