AIFAESA, MAP no Minstériu Finansa liuhusi Alfándega, halo konferénsia imprensa sobre produtu ai-han importadu iha TL. Imajen/Tatoli Egas Cristovão.

DILI, 27 novembru 2019 (TATOLI) – Diretór Nasionál Autoridade Aduaneira (AA/Alfándega), Julião José Ximenes informa, AA iha kritéria ka rekizitu haat ne’ebé importadór sira tenke kumpre hafoin hatama foos mai iha Timor-Leste.

Alfándega hala’o prosesu ba prosedimentu ida ne’e liuhusi Komérsiu Internasionál no bazeia ba dekretu lei 14/2017 kona-ba kódigu Aduaneiru Timor-Leste ninian.

“Kona-ba importasaun foos normalmente ita-nia emprezáriu internasionál no nasionál ka lokál kuandu sira hala’o ona importasaun ba produtu foos, ita iha mekanizmu lubuk ida tenke prienxe rekizitu”, Diretór Nasionál AA afirma iha edifísiu AIFAESA, Matadouru, ohin.

Rekizitu ne’ebé importadór foos tenke kumpre mak, dahuluk tenke iha sertifikadu sanitáriu ne’ebé fó sai liuhusi nasaun orijen, daruak, tenke iha sertifikadu esportasaun ba produtu foos husi nasaun orijen, datoluk, tenke iha sertifikadu kualidade produtu foos ne’ebé fó sai husi nasaun orijen no dahaat, tenke iha sertifikadu kuantidade ba merkadoria ou ba produtu ne’ebé mak hakarak atu esporta ka importa.

“Rekizitu hirak ne’e ita haree no verifika katak loos duni iha dokumentu sira ne’e para hafoin halo prosesu, bainhira rekizitu sira ne’e kompletu ona ita mós rekizita mak ita-nia rasik liuliu ba dokumentu justifikadu mai husi Komérsiu no Tributária no Kuarentena, mai husi SERVE”, katak.

Alfándega utiliza sistema ASYCUDA (Automated SYstem for CUstoms DAta) World tanba sistema ne’e mandatóriu, bainhira emprezáriu ida hakarak atu halo importasaun no esportasaun tenke kumpre automatikamente sistema ne’e.

Servisu Alfándega iha mundu tomak uza sistema ASYCUDA ne’e, ne’ebé kompletu ho sistema informasaun ba jestaun integrada. ASYCUDA administra etapa ida-idak iha prosesu alfándega nian, husi identifikasaun sasán sira-ne’ebé konsignadu ho risku aas ba inspesaun to’o prosesu ba pagamentu sira hodi liberta no entrega sasán sira. Sistema ne’e administra:  manifestu sira, operasaun tránzitu sira-nian, deklarasaun sira hotu alfándega nian, prosedimentu sira ne’ebé inserteza ka dúvida, prosedimentu sira kontabilidade nian, jestaun ba risku ASYCUDA implementa padraun internasionál hotu-hotu ba dadus komersiál nian tuir konvensaun no rekomendasaun husi órgaun sira Organizasaun Mundiál Alfándega, Organizasaun Mundiál Komérsiu, no Organizasaun Internasionál ba Padronizasaun.

AA nia responsabilidade atu haree, verifika no analiza liuliu dokumentu sira ne’e no halo ajustamentu no validasaun sistema hodi empreza selu taxa mak hafoin autoriza sasán ne’e husi portu Dili bá iha empreza sira-nia armazein.

Diretór Nasionál ne’e dehan, importasaun foos ne’ebé durante ne’e sirkula iha territóriu Timor-Leste tomak ne’e ema balun fó sentimentu iha mídia sosiál katak iha importasaun foos plástiku.

“Laiha dalan seluk katak iha importasaun liuliu ba foos ne’ebé dehan katak kontamina ho plástiku no zat sira seluk.  Foos hirak ne’e mai husi Vietnam”, garante.

Tanba ne’e, Diretór Nasionál friza AA la’ós servisu mesak, maibé iha servisu integradu entre AIFAESA, Kuarentena, MTKI no Ministériu Saúde atu haree regra no prosedimentu liuliu ba sanitária. “Ami-nia komunikasaun no kooperasaun durante iha terrenu la’o di’ak tebes”, katak.

Entretantu, Xefe Departamentu interinu Kuarentena Ministériu Agrikultura no Peska (MAP), Nelson da Costa Ruak, informa  tuir Lei Kuarentena halo mós  inspesaun no avaliasaun ba produtu agríkola ba importasaun no esportasaun liuliu foos mai  iha Timor-Leste.

Ho objetivu hodi hala’o kontrolu ba risku sira atu labele tama iha Timor-Leste hodi fó impaktu ba saúde públika, ambiente, turizmu no agrikultura.

“Ko’alia koba ba foos, Kuarentena hakarak klarifika nia pozisaun katak durante ne’e ba importasaun foos no trigu ne’e ami la asesu hodi halo inspesaun”, lamenta.

Nune’e, nia apela ba povu Timór tomak, ajénsia nasionál no internasionál katak mai koopera malu hodi bele konsidera mós regra Kuarentena.

“Kuarentena mak tenke haree sasán sira tama nia sanitaria no kualidade atu asegura moras, hodi labele lori risku seluk atu lori mai iha Timor-Leste”, nia afirma.

Xefe Departamentu ne’e salienta durante ne’e ladún koopera malu di’ak entre Kuarentena no Alfándega, mas liuhusi momentu ne’e espera bele iha kooperasaun orizontál entre Alfándega no Kuarentena bele la’o di’ak para oinsá bele kontrola sasán importasaun.

Notísia relevante : 3 Dezembru, AIFAESA Estabelese Kooperasaun Ho BPOM Indonézia Ba Kontrolu Ai-han

Jornalista : Florencio Miranda Ximenes

Editora : Maria Auxiliadora

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here