Joven Mateus Dias. Imajen: Natalino Costa.

DILI, 26 novembru 2019 (TATOLI)-Juventude Munisípiu Aileu hakribi violénsia tanba hakarak kontribui ba pás no estabilidade Timor-Leste liuliu iha Munisípiu Aileu ne´e rasik.

Tuir juventude Aileu, Mateus Dias (28), iha Munisípiu Aileu nunka rona ema tuda malu ka asalta malu no bainhira la´o kalan sente normál eh hakmatek tanba la iha buat ida.

“Iha munisípiu Aileu tenke mantein kompromisu ida ne’e hodi kontribui ba pás no estabilidade iha komunidade nia leet,” dehan Mateus Dias ba Ajénsia TATOLI iha sede suku Aisirimou, ohin.

Nia dehan, evita tentativa mosu problema, konflitu até violénsia, nu´udar joven ita tenke buka maneira oioin hasees aan husi tentativa sira ne´e. Ita tenke envolve ita-nia aan iha atividade oioin. Tenke  envolve aan iha sentru formasaun sira iha Aileu,  tenke estuda.

“Importante ba ita labele tuur no  hein de´it maibé ita tenke hakbesik ba grupu ne´ebé maka  fó kapasitasaun. Ida ne´e maka joventude,” Mateus Dias fó hanoin.

Iha fatin hanesan, Joven Abril Soares Maia (30) hateten munisipiu Aileu durante ne’e situasaun seguransa lao hakmatek no laiha buat ida ne´ebé grave. Joven sira iha Aileu kontribui tebes ba pás no estabilidade.

“Husu ba joven Aileu oan sira hatudu nafatin disiplina no comitment (kompromisu) nune’e bele kontribui ba dezenvolvimentu liuliu iha Munisípiu Aileu,” dehan Abril.

Nia dehan tan katak daudaun ne’e iha joven ida  ka rua maka seidauk involve aan iha atividade formasaun sira maibé jeralmente iha Aileu joven barak maka envolve másimu iha atividade formasaun profisionál sira.

Abril husu mós ba joven sira Aileu oan atu hamutuk nafatin hodi konstrui pás no estabilidade nune’e halais prosesu dezemvolvimentu sira iha Munisípiu Aileu rasik.

Enkuantu, nune’e mós Natanael de Jesus Pereira (31) konsidera katak juventude Munisípiu Aileu rasik iha matoridade tebes tanba durante laiha problema entre joven iha suku, aldeia no to´o bairu sira.

Natanael de Jesus Pereira. Imajen: Natalino Costa

Nia dehan agora dadaun iha munisipiu Aileu joven barak maka iha vontade tebes ho antuziasmu tuir kursu hodi kapasita sira-nia aan rasik .

“Maibé problema kampu servisu maka menus tanba governu ladun kria mekanizmu tanba ne´e husu governu tenke kria kria kampu servisu nune´e ami foinsa´e sira bele kontribui ba dezemvolvimentu,” nia sujere.

Jornalista: Natalino Costa

Editór     : Rafy Belo

HAKEREK NO HATÁN

Please enter your comment!
Please enter your name here