Deputadu Partidu Demokrátiku, Adriano do Nascimento. Imajen/ Tatoli Egas Cristovão.

DILI, 26 novembru 2019 (TATOLI) – Deputadu Partidu Demokrátiku (PD), Adriano do Nascimento, hatete mekanizmu publikasaun konkursu públiku bele liuhosi mídia Estadu  nian atu emprezáriu internasionál no nasionál bele asesu mídia ne’e, duké publika fali iha jornál internasionál.

Antigu Ministru Prezidénsia Konsellu Ministru, Adriano do Nascimento, haktuir uluk konkursu públiku fó sai iha jornál internasionál tanba hanesan kritériu ida atu Timor-Leste loke-aan no halo promosaun ba ema internasionál, nune’e sé de’it maka interese konkorre bele asesu liuhosi mídia refere, maibé agora Timor-Leste mós avansadu ona kona-ba internét, entaun Governu bele publika fali iha Ajénsia Notisioza Timor Leste, TATOLI, IP.

“Uluk ha’u ministru, ida ne’e hanesan kritériu ida katak Timor-Leste loke ba mundu ka transparénsia, tanba projetu ita-nian maka osan boot, entaun loke ba internasionál, nune’e atu loke tenke halo promosaun, katak Timor-Leste iha projetu, ne’ebé sé de’it bele kompete no sé de’it bele halo”, Adriano do Nascimento ba Ajénsia TATOLI iha Parlamentu Nasionál, ohin.

Adriano rekoñese katak uluk nivel kobertura mídia nian ladún to’o ba rai-li’ur ho kauza internét mós sei susar, entaun dalan ida atu halo lais maka publika iha jornál estranjeiru, atu ema bele asesu hodi kandidata.

“Publikasaun uluk ne’e laiha buat ida tanba ita nasaun foun no ita hakarak nakloke, maibé daudaun ne’e ita bele publika ona iha rai-laran, atu ema estranjeiru ka nasionál bele asesu efetivamente Ajénsia TATOLI, ne’ebé ho publikasaun atualizada”, nia salienta.

Nune’e nia espera katak Governu liuhosi Komisaun Nasionál Aprovizionamentu (CNA, sigla portugés) bele iha hanoin atu halo mudansa ba lei, nune’e Timor-Leste bele halo poupansa osan ba publikasaun tanba konkursu fó sai iha jornál internasionál ho osan boot, maibé bainhira publika iha mídia TATOLI parte ida ita promove ajénsia Estadu.

“Atu muda dekretu Governu, ida ne’e kompeténsia Governu nian, se ita-nia nosaun maka atu poupa osan Estadu nian, entaun ida ne’e di’ak, bele publika iha ita-nia rai liuhosi ita-nia ajénsia, atu ema bele hakbesik hodi lee notísia no konkursu ne’ebé fó sai”, katak.

Enkuantu, reuniaun ordinária Konsellu Administrasaun ba Fundu Infraestrutura (CAFI, sigla portugés), 6 novembru 2019, iha edifísiu Ministériu Finansa, ko’alia kona-ba prosesu aprovizionamentu ne’ebé nesesita orsamentu hodi responde taxa anuál ba publikasaun iha jornál sirkulasaun internasionál.

Hosi parte legál mós haree ona katak situasaun atuál ho lei ne’ebé iha, la kondís ona ba malu, maske nune’e, prosesu aprovizionamentu hotu tenke la’o tuir lei ne’ebé iha ona atubele asegura transparénsia, maibé rekomendasaun CAFI iha ámbitu reuniaun, prefere liu atu publika iha mídia eletrónika kompara ho publikasaun iha jornál internasionál ne’ebé selu kustu boot ba kada projetu, nune’e Governu sei gasta osan boot liu bainhira publika projetu barak iha tinan ida nia-laran, nune’e husu atu iha mudansa ba lei tanba la korresponde ona ho situasaun atuál.

Entretantu, bainhira maka muda lei tanba durante ne’e CNA publika konkursu iha jornál internasionál ho montante osan ne’ebé tinan-tinan selu ba projetu no CNA sei prefere atu publika konkursu iha mídia eletrónika bainhira muda lei.

Ajénsia TATOLI halo ona audiénsia ba CNA atu konfirma asuntu ne’e, maibé to’o agora seidauk hetan resposta.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here