Uniaun Europea (UE)

DILI, 25 novembru 2019 (TATOLI)—Diretór Nasionál Saúde Públiku, Pedro Canisio, hateten Uniaun Europeia fó apoiu millaun $10 ba Ministériu Saúde atu asegura inan isin-rua no promove aihan lokál no hadi’a saneamentu báziku.

“Apoiu ida ne’e, Ministériu Saúde haree ba intervensaun planu hodi haforsa no halo diskusaun ba indikadór balun ne’ebé mak akontese, no oinsá atu asegura ba inan isin-rua no labarik tinan lima mai kraik. Apoiu ida ne’e fó tulun Ministériu Saúde oinsá mak atu promove ai-han lokál no oinsá atu hadi’a saneamentu báziku. Ba ida ne’e, mak Ministériu Saúde sei hadi’a estratejia tinan lima ne’ebé mai,” dehan Pedro Canisio ba jornalista sira.

Nia hatutan, Fundu Uniaun Europea apoiu Ministériu Saúde ne’e loloos orsamentu hamutuk millaun $15 ba tinan ida ne’e maibé Ministériu Saúde hetan de’it $10 millaun no millaun 5 seluk ne’e sei fó apoiu ba UNICEF (Fundu Organizasaun Nasaun Unida ba Labarik, sigla inglés)

“Ministériu Saúde hetan apoiu orsamentu hamutuk millaun $15. UNICEF mak implementa millaun $5 maibé programa hirak ne’e ita implementa hamutuk entre UNICEF ho Ministeriu Saúde. UNICEF sira apoiu liu ba iha tekniku nian no sira mós kompras suplementu balun hanesan ba tratamentu ba iha má nutrisaun ne’ebé komplikadu hodi halo tratamentu,” dehan Diretór Nasionál Saúde Públiku, Pedro Canisio.

Diretór Nasionál Saúde Públiku ne’e dehan, UNICEF mós apoiu ekipamentu balun hanesan laptop hodi fó ba Koordenadór Nutrisaun sira uza, hodi halo relatóriu no halo monitorizasaun ba programa sira ne’ebé mak iha.

“Planu estratejia ne’e sempre iha tinan lima. Agora to’o ona tempu atu ita bele halo revizaun fila fali ba estratejia foun. Planu estratejia anteriór ne’e hahú iha tinan-2014 no ramata iha 2019. Entaun, ita hanoin fali ba iha tinan 2020 to’o 2024 ninian,” nia informa.

Tuir nia, Minstériu Saúde bolu ona parseiru no liña ministeriál sira hotu ne’ebé hamahan-aan iha Konsellu Nasionál Ai-han (KNA) no sira ne’ebé mak iha papel boot tebes hodi kontribui no redusaun ba má nutrisaun iha Timor-Leste.

“Iha estratejia ne’e, ita ko’alia hamutuk kona-ba atu hadi’a nutrisaun inan isin-rua no oan sira. Intervensaun ne’e ba labarik tinan-lima mai kraik no intervensaun ba iha oinsá atu hasa’e koñesimentu komunidade nian ba iha ai-han lokál ne’ebé nutriente. Ida ne’e mak ita tuur hamutuk hodi fó hanoin ba malu para hadi’a estratejia ida ne’e,” nia dehan.

Buat ne’ebé presiza haree hamutuk, tuir nia, prioridade Governu mak haree liu redusaun ba má nutrisaun maibé intervensaun ba kada miniateriais mak seidauk tuur hamutuk. Intervensaun ne’e atu koñese malu liuliu husi Minstériu Saúde nia parte, saúde mak atu redus má nutrisaun no parte husi agrikultura mak tenke haree ba iha asegura seguransa alimentár.

Nia esplika, husi parte Ministériu Saúde haree liu ba oinsá atu apoiu ba SAMES (Servisu Autonómo Medikamentu no Ekipamentu Saúde) oinsá atu hola suplementu no halo tratamentu ba inan isin-rua liuliu oinsá fó susu ba labarik tinan lima mai kraik.

Iha ne’e, nia hateten, Institutu Nasionál Saúde (INS) halo formasaun no mós halo monitorizasaun no halo avaliasaun atu haree programa sira hanesan Saúde ba Família hodi vizita uma kain sira. Parte seluk, nia dehan, halo promosaun saúde ba komunidade oinsá atu hadi’a koñesimentu ba iha ai-han lokál no nutrisaun.

Nia hateten, programa oitavu Governu nian mak hanesan programa redusaun ba má nutrisaun no intervensaun saúde mak Governu tenke halo. Tanba ne’e, nia dehan, Governu tenke aliña tanba programa ne’e la bele sees husi planu estratejia ba tinan 2011 too 2030. Hafoin ne’e mak Governu sei haree fila fali ba programa Governu tanba estratejia ne’ebé mak ita halo ne’e hahú tinan 2020-2024.

“Pilar dahuluk mak ita fó atensaun ba inan isin-rua nomós labarik sira. Daruak,  promove inan isin-rua. Datoluk, halo tratamentu. Dahaat, ba sira ne’ebé mak kona-ba mál nutrisaun. Iha advokásia ne’e, ita haree ba iha estratejia oinsá tau kedas atensaun ba inan isin-rua no labarik sira ne’eb’e moris mai labele difisiente no status nutrisaun no kondisaun saúde mós di’ak,” nia esplika.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here