Emblema partidu CNRT, PLP no KHUNTO

DILI, 25 novembru 2019 (TATOLI)–Deputadu Bankada Partidu Libertasaun Populár (PLP) no Kmanek Haburas Unidade Nasionál Timor-Oan (KHUNTO) apoia diálogu hodi solusiona impase polítika rai-laran. Enkuantu, Deputadu Bankada Congresso Nacional da Reconstrução de Timor (CNRT), espera komunikasaun bele la’o ho susesu.

Deputadu Bankada Parlamentár PLP, Sabino Soares ‘Guntur’ hateten líder Estadu sira mak iha kompeténsia no responsabilidade atu hakotu impase polítika ne’e.

“Ha’u hanoin katak saida mak sira halo ne’e buat di’ak ba vida Estadu no povu”, Guntur ba TATOLI iha resintu Parlamentu Nasionál, segunda ne’e.

Guntur husu Xanana Gusmão, Taur Matan Ruak, Francisco Guterres ‘Lú Olo’, Marí Alkatiri no Ramos Horta, buka maneira tuur hamutuk solusiona impase polítika ne’e.

“Atu nesesáriu ka lae, ne’e depende ba kondisaun. Se sira sente kondisaun iha ona ne’e atu orienta Estadu, ne’e depende ba sira. Ne’ebé, Estadu atu sai di’ak ka aat ne’e sira-nia responsabilidade”, Deputadu PLP haklaken.

Aleinde ne’e, Deputada Bankada KHUNTO, Olinda Guterres, apresia ho ideia ne’e.

“Ida-ne’e mak KHUNTO nia hakarak. Ha’u sempre ezije tanba saida mak maun-boot sira labele tuur hamutuk hodi halo konsensu”, nia subliña.

Tuir nia, atu besik tinan rua ona povu terus no la hetan benefísiu hosi ukun ida-ne’e, tanba ne’e dalan diálogu nesesáriu duni.

Entretantu, Deputadu Bankada CNRT, Adérito Hugo da Costa, hateten se iha komunikasaun ba diálogu espera iha vontade nune’e komunikasaun ne’e bele hetan resposta hosi parte sira seluk no presiza define diálogu ne’e ba ajenda saida.

Nia hatutan, kanál Estadu nian liga ho órgaun soberanu sira funsiona hela, hanesan Governu ho Parlamentu Nasionál, Parlamentu Nasionál ho Prezidente Repúblika, depois liga ho kompeténsia Tribunál nian.

Nia subliña, entermu órgaun soberanu, Prezidente Repúblika iha nia obrigasaun hamosu inisiativa diálogu hodi fó kontribuisaun ba Estadu nia funsionamentu.

“Se funsionamentu Estadu iha lakuna no defisiente ruma, entaun Prezidente Repúblika iha obrigasaun atu haree ida-ne’e. Tan ne’e mak ho mensajen sira-ne’e, ita hein katak bele iha vontade polítika para aserta depois identifika pesoál sira ka grupu sira-ne’ebé hola parte iha diálogu ne’e, depois ita bele hatene sé-sé ho ajenda saida”, kuadru CNRT ne’e tenik.

Maibé, Deputadu CNRT ne’e preokupa, atu buka kanál diálogu ne’e informál mak uza ka halo nusá, tanba tenke define loloos espasu ba diálogu ne’e.

“Tenke aserta problema saida no figura sira-ne’ebé atu partisipa iha diálogu ne’e, la’ós diálogu rame-rame. Komunikasaun entre órgaun soberanu sira la’o hela. Primeiru-Ministru hasoru Prezidente Repúblika semana-semana, ne’e ita atu dehan diálogu ka atu dehan saida”, Hugo informa.

Deputadu CNRT ne’e rekoñese katak durante ne’e komunikasaun la’o hela, maibé labele sai hanesan konsumu públiku tanba segredu Estadu.

Antes ne’e, Primeiru-Ministru, Taur Matan Ruak dehan esforsu ne’ebé Governu sei halo dahuluk maka oinsá membru Governu hirak-ne’ebé seidauk hetan pose.

“Ha’u-nia atensaun dahuluk maka membru hirak-ne’ebé seidauk hetan pose bele simu ona pose. Prezidente Repúblika hateten mai ha’u dalan di’ak maka diálogu. Ha’u hanesan Primeiru-Ministru apoiu diálogu ne’ebé Prezidente fó sai atu bele buka solusaun”, Taur deklara.

Iha parte seluk, liuhusi konferénsia nasionál Aliansa Maioria Parlamentár (AMP) iha 16 novembru 2019, observa katak membru Governu ne’ebé ladauk kompletu kontinua lori prejuizu ba implementasaun programa Governu Daualuk, inklui afeta ba planu asaun anuál no ezekusaun orsamentu anuál. Tanba ne’e, solisita Primeiru-Ministru, Taur Matan Ruak atu: (a) halo nafatin komunikasaun ho Prezidente Repúblika hodi asegura tomada pose ba membru Governu indijitadu sira, (b) husu Prezidente Repúblika justifika formalmente “por escrita” nia pozisaun kona-ba membru polítika sira ne’ebé indijitadu ona no (c) bainhira laiha solusaun ba membru Governu indijitadu sira, AMP sei la halo diálogu ho kualker entidade no personalidade polítika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here