Sesaun plenária Parlamentu Nasionál. Imajen/Tatoli

DILI, 25 novembru 2019 (TATOLI) – Tuir ajenda ne’ebé iha, Parlamentu Nasionál (PN) sei halo diskusaun no votasaun jeneralidade ba Proposta Lei no. 8/V (2.a), Orsamentu Jerál Estadu (OJE) 2020 durante loron tolu nia laran, maibé tanba razaun Xefe Bankada UDT/FM, Gilman Exposto dos Santos hakotu iis ohin dadér, diskusaun ne’e adia ba aban.

Vise-Prezidente Parlamentu Nasionál, Maria Angelina Lopez Sarmento, hateten diskusaun orsamentu ne’e adia atu fó biban ba deputadu sira hodi presta omenajen ba Deputadu efetivu ne’e.

Vise Prezidente Parlamentu Nasionál, Maria Angelina Lopes Sarmento. Imajen/Tatoli.

“Hosi reuniaun líder bankada ne’ebé akontese ohin ho líder bankada hotu, Parlamentu deside atu adia debate Orsamentu Jerál Estadu 2020 ne’ebé tuir loloos komesa ohin, adia fali ba aban atu nune’e loron ida ohin ne’e deputadu sira bele iha biban atu ba presta omenajen ba Deputadu Gilman hosi Bankada UDT/FM”, tenik Deputada Angelina iha resintu PN, segunda ne’e.

Tuir Deputada Bankada PLP ne’e, Deputadu ne’e efetivu la’ós hanesan deputadu sira-ne’ebé mandatu hotu ona no termina sira-nia jornada moris iha mundu ne’e, maibé deputadu ne’e iha momentu serbisu hela no asume hela funsaun.

“Tanba nia hanesan Deputadu efetivu, nia mate ne’e hanesan uma-laran no família boot Parlamentu Nasionál, ho nune’e maka ami deside loron ohin adia orsamentu ne’ebé atu hahú ho jeneralidade. Ami sei presta omenajen iha Deputadu Gilman nia mate isin iha uma no sentidu pézame ba família”, Deputada bankada Governu ne’e akresenta.

Tuir ajenda, abertura ba diskusaun OJE 2020 ba jeneralidade loron ohin sei hahú iha tuku 10 dadér.

Debate ne’e sei hahú ho aprezentasaun Proposta Lei OJE 2020 hosi Primeiru-Ministru, Taur Matan Ruak durante minutu 60 nia laran, ho estensaun hosi meza ho minutu 30 nia laran bainhira iha kazu nesesáriu hodi aprezenta.

Tuir mai aprezentasaun konkluzaun relatóriu no pareser hosi Komisaun C ne’ebé trata Asuntu Finansa Públika hosi Prezidente Komisaun ka relatór durante minutu  60, no bainhira presiza tan tempu, meza bele konsidera no fó tan tempu adisionál.

Hafoin aprezentasaun ne’e, Governu sei responde no komenta ho durasaun tempu minutu 30, kona-ba kestaun ne’ebé koloka iha relatóriu pareser Komisaun C.

Tuir mai, iha mós tempu intervensaun ba kada Bankada Parlamentár ne’ebé determina ona.

Diskusaun no votasaun ba espesialidade sei akontese iha loron 29 novembru no ramata iha loron 12 dezembru. Hafoin ne’e, iha loron 13 dezembru, sei enkamiña redasaun finál ba Prezidente Repúblika.

Jornalista: Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here