Imajen Proklamasaun RDTL 28 novembru 1975. Foto espesiál

AILEU 25 novembru 2019, (TATOLI)-Munisípiu Aileu sei komemora loron proklamasaun indepedénsia ba dala 44 iha loron 28 novembru ho atividade sira hanesan feira, halai maratona no orden unida husi estudante sira hodi anima komunidade iha munisípiu ne´e rasik.

Administadór Munisípiu Aileu, João Tilman do Rêgo, hateten nia parte simu ona orientasaun hosi nasionál hodi prepara ba komemorasaun loron nasionál ne’e.

Prezidente Autoridade Munisipál Aileu, João Tilman do Rego. Imajen/ Nelia Fernandes

Ami simu ona orden hosi Vise-Ministru Administrasaun Estatál (Abílio José Caetano) katak membru governu sira sei la partisipa iha seremónia liuliu ba iha inspetur serimónia ninian. Orientasaun ida ne’e fó ba administradór no prezidente autoridade sira maka sai inspetur serimónia ba komemorasaun loron proklamasaun independénsia ba dala 44 iha munisípiu”, hateten Administradór Aileu ne’e ba TATOLI iha nia kna’ar fatin, Munisipiu Aileu, ohin.

Nia hatutan: “Preparasaun internál iha Munisípiu Aileu rasik agora daudauk komisaun no sub-komisaun sira hotu, ohin loron ikus enkontru ba preparasaun. Ami mós koordena ona ho komando PNTL Munisípiu Aileu fó treina ba estudante sira liuliu sira ne’ebé hola parte direta iha formatura isar bendeira nian”.

Lider másimu Aileu ne’e afirma, iha komemorasaun ne’e sei realiza mós atividade balu hodi anima komunidade. “Ami mós sei realiza atividade ordén únida ba estudante sira, atividade ida mós kona-ba halai maraton, no atividade feira tuir planu aban sei abertura iha Sabraka-laran, Aileu Vila”.

Administrador ne’e dehan, atividade sira ne’e realiza hodi hatudu katak partisipasaun komunidade nian importante.”Atividade sira ne’e realiza hodi partisipa hosi komunidade atu hateten katak loron nasionál ne’e ita nian no ba timoroan rasik no timoroan sira rasik maka hato´o afirmasaun katak loron boot ne’e ita nian no ita maka tenke fó onra”.

Relasiona ho komemorasaun loron istóriku ne´e, Administadór João Tilman do Rêgo husu ba povu Aileu espesiáll ba joven sira  katak hamutuk hodi selebra loron importante ne’e ho didi’ak ho responsabilidade tanba ohin loron ita bele hakmatek, goza liberdade tanba éroi sira fakar ran, soe isin hodi sosa ukun rasik aan.

Entretantu, orsamentu ne’ebé aloka ba komemorasaun 28 novembru iha Munisipiu Aileu hamutuk $3.650. Kada postu administrativu $750, no iha postu administrativu Aileu Vila $1.500.

Postu Administrativu sira iha Munisípiu Aileu mak hanesan Aileu Vila, Laulara, Lequidoe no Remexio.

Jornalista: Antónia Gusmão

Editór     : Rafy Belo

HAKEREK NO HATÁN

Please enter your comment!
Please enter your name here