Administrasaun Munisípiu Aileu. Imajen Tatoli/Rafy Belo

AILEU, 25 novembru 2019 (TATOLI)-Administadór Munisípiu Aileu, João Tilman do Rêgo informa katak Munisípiu Aileu aprova ona planu estratéjiku munisipál.

“Planu ba jere rekursu umanu no rekursu naturál iha Munisípiu Aileu maka foin lalais ami halo ona aprovasaun ba planu estratéjiku Munisipál. Planu ne’e maka sai matadalan ka sai giaun ba ami durante tinan lima (2019-2023)”, dehan Administrador Munisípiu Aileu, João Tilman do Rêgo ba TATOLI iha nia servisu fatin Aileu, ohin.

Administradór ne’e hatutan, hosi planu estratéjiku ne’e ajusta ba Planu Estratéjiku Dezenvolvimentu Nasionál (PEDN). “Signifika buat ne’ebé ami halo labele halai ses hosi PEDN, entaun ami aprova ona no submete tiha ona ba Ministériu Administrasaun Estatál (MAE) no hein katak iha dezembru tinan ne’e bele halo ona lansamentu iha nasionál no atribui filafali ba minisípiu hodi implementa”.

“Ha’u hakarak dehan planu ida hosi planu estratéjiku Nasionál ne’e maka hanesan; iha Ministériu Turizmu ne’e iha Munisípiu ami iha programa maka, turizmu kulturál, turizmu istóriku, turizmu montaña, turizmu komunitária no turizmu relijiozu. Ami prontu ezekuta no koordena nafatin planu sira ne’ebé mak governu maka kaer maibé nia implementasaun iha Munisípiu”, afirma João Tilman do Rêgo.

Autoridade másima Aileu ne’e esplika, planu sira ne’ebé maka kaer hosi Ministériu no implementasaun iha Munisípiu maka hanesan ajénsia planeamentu Munisipál hanesan projetu Planu Dezenvolvimentu Nasionál ne’ebé sei implementa iha futuru ne’e iha ona ajénsia maka sei haree no hetan apoia téknika hosi Ajénsia Dezenvolvimentu Nasionál (ADN) no enjeñeiru Munisipál nian.

Entretantu, Munisípiu Aileu nu´udar munisípiu ida ne´ebé lokaliza iha parte sul kapitál Timor-Leste (Dili). Munisípiu ne´e kompostu husi Postu Administrativu haat hanesan Aileu Vila, Laulara, Lequidoe no Remexio. Inklui, suku 31 no aldeia 135.

Jornalista: Antónia Gusmão

Editór   : Rafy Belo

HAKEREK NO HATÁN

Please enter your comment!
Please enter your name here