Kondisaun estrada dirasaun Suku Waibobo ba Nahareka, Postu Administrativu Ossu, Munisípiu Viqueque. Imajen TATOLI/Cipriano Colo

VIQUEQUE, 22 novembru 2019 (TATOLI)–Padre Rezidensiál Estasaun Misionária Nossa Senhora Imaculada Coração de Maria Nahareka, Bernardo Manuel Luís, preokupa ho estrada ligasaun Baucau – Nahareka, tanba to’o oras ne’e kondisaun grave tebes, iha ne’ebé difikulta komunidade atu transporta produtu lokál ba kapitál nasaun.

“Ami-nia problema boot liu iha ne’e mak estrada. Estrada halo komunidade izola-an ho produtu lokál sira ne’ebé barak tebes”, Padre Rezidente ne’e hateten lia hirak ne’e iha ninia rezidénsia Nahareka, Postu Administrativu Ossu, Munisípiu Viqueque, sesta ne’e.

Padre Bernardo fó hanoin ba ukun-na’in sira atu tau mós prioridade ba área rurál sira, tanba populasaun la ezije buat barak tanba populasaun Nahareka la’ós populasaun ezijente, maibé sira hakarak mak estrada.

Bibi-atan ne’e mós dala barak tenke la’o ain kuaze kilómetru 20 to’o 30 atu halo selebrasaun iha kapela sira área rurál ne’ebé pertense ba Nahareka.

“Ita uza motór iha tempu bailoron, maibé tempu udan motór sira la funsiona hotu tanba tahu maka’as, estrada kuak maka’as, pasiénsia tenke la’o tanba ida-ne’e ha’u-nia misaun atu serbí ha’u-nia sarani sira. Tanba ne’e, ami iha área izoladu ne’e presiza urjente mak estrada”, nia konta tuir.

Amo Bernardo mós fó hanoin nafatin ba populasaun iha Nahareka atu unidade nafatin, kontinua servisu hamutuk hodi koopera ho kualker entidade hanesan ajénsia internasionál sira ka Governu rasik ne’ebé hakarak atu fó ajuda hodi hadi’a estrada ligasaun Baucau-Nahareka.

“Unidade mak ita-nia forsa atu bele ultrapasa situasaun hotu no ita tenke prontu atu simu dezenvolvimentu iha ita-nia suku ne’ebé izoladu tebes”, bibi-atan ne’e fó hanoin.

Nune’e mós, Diretór Interinu Eskola Ensinu Báziku Sentrál (EBC-sigla portugés) Primeiru no Segundu Síklu Nahareka, Guido Sequeira mós preokupa ho kondisaun estrada ne’ebé sai problema boot iha Suku Nahareka.

“Ami hakarak fó hanoin ba Estadu katak ami iha área rurál liuliu iha Suku Nahareka presiza estrada”, nia haklaken.

Kona-ba preokupasaun hirak-ne’e, Xefe Suku Nahareka, Paulino Alberty Ximenes rekoñese no hatán ho emosaun katak loos duni estrada kontinua aat, no situasaun ne’e difikulta movimentu transporte no impede komunidade atu transporta produtu lokál ba kapitál nasaun.

“Ukun-an ona tinan 20, maibé Estadu nunka tau-matan ba Nahareka. Tinan-tinan ekipa oioin mak mai sukat hela de’it estrada  ne’e, maibé to’o agora seidauk realiza”, nia haktuir.

Nia mós rejeita katak durante ne’e ema balun akuza veteranu sira mak halo impedimentu ba dezenvolvimentu iha suku ne’e, liuliu kona-ba estrada, maibé nia klarifika katak durante ne’e veteranu sira sempre servisu hamutuk no hakarak atu Estadu tama lori dezenvolvimentu oioin iha suku ne’e.

Nia salienta, Suku Nahareka presiza tebes estrada ne’ebé di’ak tanba populasaun iha suku ne’e iha produtu lokál barak la lori sai ba kapitál nasaun hanesan nuu, kamii, bua, tua sabu no produtu lokál sira seluk tan.

Autoridade lokál hato’o beibeik problema ne’e ba Governu dezde Kuartu Governu Konstitusionál, maibé to’o oras ne’e laiha rezultadu.

Totál populasaun Suku Nahareka, Postu Administrativu Ossu, Munisípiu Viqueque, hamutuk 2.225 ho totál uma-kain 600, mai husi aldeia lima hanesan Makabu’u, Maurate, Darenau, Saborogo no Raila’a.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here