Xefe Estadu Maiór, Koronél Calisto Santos Coli “Coliati” despede membru Komponente Navál F-FDTL na’in 25 ne’ebé sei ba tuir formasaun iha Austrália iha Komandu Komponente Navál Hera. Imajen/Eugénio Pereira

HERA, 22 novembru 2019 (TATOLI)–Membru FALINTIL-Forsa Defeza Timor-Leste (F-FDTL) hosi Komponente Navál na’in 25 (Mane 21 no feto haat), sábadu (23/11/2019), dezloka ba Austrália hodi tuir formasaun durante semana tolu iha Ró MV SYCAMORE/HMAS WATERHEN SYDNEY HARBOUR hodi prepara sira nia rekursu atu lori ró boot rua ne’ebé Governu Australia sei fó mai Timor-Leste iha 2023.

Notísia Relevante : Austrália Prontu Kapasita Timor-oan ba Protesaun Fronteira

Dezeñu ró Militár ne’ebé Austrália sei fó ba Timor-Leste ha 2023. Imajen/Austrália

Xefe Estadu Maiór, Koronél Calisto Santos Coli “Coliati” husu ba membru sira ne’ebé ba tuir formasaun atu aproveita tempu semana tolu aprende ho di’ak para gaña esperiénsia prepara-aan kontribui ba dezenvolvimentu rekursu umanu Komponente Navál nian.

“Formasaun iha Ró MV SYCAMORE ne’e importante tebes, tanba Governu Austrália oferese ró patrulla protetór boot rua ne’ebé agora daudaun ninia konstrusaun halo hela iha Pert Austrália,” informa  Coliati, ohin, iha Komponente Navál, Hera.

Nia dehan, knaar komponente navál nian importante tebes atu hala’o misaun ne’ebé estadu atribui hodi garante no kontrola rikusoin Timor-Leste nian iha tasi laran.

“Imi tenke sente orgullu hodi hatudu komportamentu no dixiplina iha eskola laran no treinu ho ró iha tasi laran durante semana tolu,”  Coliati hateten.

Coliati hato’o agradese ba laran luak hosi Forsa Austrália nian ne’ebé durante ne’e fó apoiu makas ba dezenvolvimentu rekursu umanu Komandu F-FDTL.

Fatin hanesan, Komandante Komponente Navál, Tenente Koronél, João Silva, husu ba membru sira ne’ebé ba tuir formasaun atu kumpre regra no dixiplina reprezenta povu Governu Timor-Leste.

“Ha’u husu imi kontinua mantein ita boot sira nia dixiplina no ita boot sira nia atitude no komportamentu di’ak durante tuir formasaun ne’e hodi simu matéria ho pozitivu,” nia espera.

Komandante Navál fiar membru sira ne’e sei hasa’e sira nia rekursu hodi prepara atu simu responsabilidade lori ró militár boot rua iha futuru.

Asesór Defeza Austrália, Majór Luk Willwood dehan, formasaun ne’e importante hodi treina membru sira hasa’e sira nia kapasidade hodi prepara simu ró boot rua ne’ebé Austrália sei fó ba Timor-Leste.

“Ami espera iha semana tolu iha Austrália sira bele dezenvolve sira nia rekursu no koñese ekipamentu sira iha ró laran no halo kontrola iha ró ne’e oinsá,” dehan Majór Luk Willwood.

Nia dehan, Australia hakarak ajuda membru Komponente sira bele prepara sira nia rekursu ho sufisiente jere no kontrolu di’ak ba ró rua ne’e bainhira Governu Austrália entrega.

Governu Timor-Leste deside ona atu tuir programa seguransa Marítima Pasífiku hosi Governu Australia, ne’ebé sei oferese ró patrulla rua no daudaun ne’e sei konstrui hela hosi kompañia Austrália.

Iha programa ida ne’e, Australia sei toma konta ba pagamentu konstrusaun ba ró rua depois sei oferese ba nasaun viziñu sira iha illa pasífiku nian, nu’udar parte hosi meus ida atu fortifika seguransa marítima iha rejiaun ne’e.

Ró primeiru sei oferese dahuluk iha tinan 2023, depois ró segundu nian sei oferese tan iha tempu tuir mai. Antes ró sira ne’e to’o iha Timor-Leste, Austrália sei haruka uluk ró ki’ik mai ne’ebé bele utiliza hodi treina seguransa iha tasi Timor.

Navál Austrália sei haruka tékniku sira atu halo manutensaun ba ró ne’e. Kada ró patrulla ne’e nia naruk metru 39,5, luan  metru 8, no kapasidade tula pasajeiru hamutuk ema na’in 23.

Ró sira ne’e sei utiliza kilat boot tolu no sei kompletu ho sistema navegasaun nian ho mós sistema komunikasaun ne’ebé moderna sofistikadu.

Ró sira ne’e mós iha kapasidade velosidade kuaze 3.000 mil itál ba tasi nian, ró ne’e iha biban boot liu atu halo patrullamentu ba área tasi mane (Kosta Súl nian).

Iha sorin seluk, ró sira seluk ne’ebé tuan ona labele halo operasaun iha tasi Timor-Leste tanba tasi ho laloran boot, tanba ne’e mak durante ne’e patrullamentu ba tasi kuaze laiha monitorizasaun maski importante ekonomikamente ba Timor-Leste.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here