Ekipa Institutu Petróleu no Jeolojia observa direta ahi-suar manas iha suku Fahi-Lebo. Imajen/Jeolojia.

DILI, 22 novembru 2019 (TATOLI) – Diretór Institutu Petróleu no Jeolojia (IPG, sigla portugés) ba Asuntu Minerál, Elias da Silva Cabral, husu ba abitante Fahi-Lebo, Postu Administrativu Bazartete, Munisípiu Liquiçá, atu labele hala’o atividade besik iha fatin suar manas tanba iha gás kahur ho venenu ne’ebé fó risku ba saúde umana.

“Ho rezultadu observasaun, IPG konklui posibilidade suar no lakan manas ne’e nu’udar gás husi materiál orgánika ne’ebé mak iha venenu uitoan, bainhira ema besik bele afeta ba nia saúde hanesan ulun moras, oin halai no kuandu sai maka’as liután bele ameasa ema nia vida”, Diretór IPG afirma ba TATOLI iha knaar fatin Delta III, ohin.

Elias da Silva husu ba abitante sira atu labele pániku no ta’uk tanba laiha impaktu atu rai halai ka hamosu vulkanu (gunung berapi).

“Suar manas husi rai okos ne’e posibilidade ki’ik liu atu akontese liga ba atividade vulkanu nian”, esplika.

Nia adianta ahi no suar manas iha mós posibilidade ba gás naturál ne’ebé mak sai tanba rai nakdoko ne’ebé iha outubru nia laran iha tasi Banda afeta ba falla ativu.

Nune’e, rekomenda ona ba autoridade lokál, liuliu abitante sira atu labele besik ou hala’o atividade iha fatin suar manas refere tanba sei afeta ba saúde.

IPG Observa Iha Gás Matan

Diretór IPG ba Asuntu Minerál, Elias da Silva Cabral, dehan observasaun IPG iha ahi-suar manas ne’e iha espetativa rua mak hanesan atividade geothermal (manas husi rai okos) no gás naturál mak mosu iha area ne’ebá.

Amostra materiál organika ne’ebé foti iha ahi suar fatin. Imajen/IPG.

Ho espetativa rua ne’e, nia dehan ekipa IPG hala’o observasaun direta iha 21 novembru, hamutuk ho rezidente iha área refere bá iha fatin akontesimentu hodi halo prova ba fenómena natureza refere.

Métodu ne’ebé mak IPG utiliza observasaun fízika no interpretasaun bazeia ba materiál hirak ne’ebá mak afetadu no sai hanesan media ba suar manas ne’ebé sai.

Materiál hirak ne’ebé mak afeta direta no konsege hala’o observasaun fízika mak materiál ne’ebé eziste no besik iha fatin akontesimentu hanesan fatuk ou rai, bee no koko rasik temperatura ba suar refere to’o grau célcius 200.

Aléinde ne’e, IPG utiliza mós dadus historical ba rai nakdoko outubru 2019 nian, ne’ebé akontese iha área besik illa Timor-Leste maioria iha parte norte ou área tasi Banda nian.

Nia dehan, ba fatuk ou rai ne’ebé mak sai hanesan media ba suar identifika katak iha indikasaun materiál orgánika hanesan ai-horis ne’ebé mak akumula kleur iha rai-okos iha ambiente anaerobic ou laiha sirkulasaun ruma no bele akumula gás ne’ebé mak iha venenu uitoan no tanba tempu agora temperatura maka’as maizumenus célcius 34 bele hamosu ahi-suar ne’ebé sai iha rai nakloke.

“Ami sei kontinua monitoriza no observa tanba seidauk identifika tipu gás husi ahi-suar ne’e”, katak.

IPG mós observa ba bee-matan ne’ebé besik iha área refere, distánsia maizumenus metru haat husi suar, maibé la afeta ba temperature bee ne’e.

“Iha iis husi suar manas ne’e rasik mós iha posibilidade sulfur uitoan ne’ebé mak sai hamutuk ho gás ne’ebé mak ninia tipu gas refere seidauk identifika loloos”, informa.

Temperatura husi suar manas ne’e kuaze grau célcius 250 no halo rai sai kór-mean ba xokolate hanesan sunu.

IPG mós rekolla informasaun husi abitante katak suar manas ne’ebé mosu iha suku Fahi Lebo, Bazartete, Munisípiu Liquiçá, akontese iha 30 outubru 2019, maizumenus tuku 03.00 loraik.

Entretantu, suar manas refere tuir informasaun abitante sira katak la’ós foin ba dahuluk akontese, maibé iha 1985 mós akontese ona iha área refere ho distánsia husi fatin agora maizumenus kilómetru 4, besik estrada Dili bá Ermera nian.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here