Imajen/Espesiál

DILI, 21 novembru 2019 (TATOLI)-Autoridade Munisípiu Dili iha tempu badak sei halo lansamentu hodi deklara Jardín B.J. Habibie nu’udar zona livre tabaku.

Notísia Relevante : Ema Seidauk Koñese Lei Kontrolu Tabaku

Desizaun Autoridade Munisípiu Dili nian ne’e bazeia ba Dekretu Lei Nú.14/2016, 8 juñu,  kona-ba rejime kontrolu tabaku.

Dekretu lei ne’e rasik vigór ona iha dezembru 2016, maibé ema seidauk kumpre ho didi’ak lei ne’e. Tanba ne’e mak ema kontinua fuma sigarru iha fatin públiku, inklui iha transporte públiku nia laran.

Prezidente Autoridade Munisípiu Dili, Gaspar Soares, ohin, iha nia servisu fatin, Administrasaun Munisípiu Dili, informa, Munisípiu Dili hahú inisia oinsá mak atu deside hodi  halo lansamentu dahuluk ba fatin balu hanesan, Jardín B.J.Habibie hodi deklara zona livre tabaku.

“Ami mós sei hatete ba estudante sira hosi eskola primária to’o universidade no mós profesór sira atu labele fuma iha tempu atividade aprendizajen,” Gaspar Soares afirma.

Iha fatin hanesan Komandante PNTL Munisípiu Dili, Armando Monteiro, hateten, nia parte mós orienta ona ba polisia unidade tránzitu atu halo auto estop hodi implementa mós lei tabaku nian.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here