Estudante eskola Ensino Basico Central (EBC) 1,2,3 Fleicha, Postu Administrativu Maubisse, Munisípiu Ainaro. Imajen Tatoli/Egas Cristóvão.

MAUBISSE, 20 novembru 2019 (TATOLI)— Eskola Ensinu Báziku Sentrál (EBC-sigla portugés) 1,2,3 Fleicha, Postu Administrativu Maubisse, Munisípiu Ainaro, enfrenta hela bee-moos no la eletrisidade.

Xefe Gabinete Eskola Ensinu Báziku Sentrál 1,2,3 Fleicha, Edelburga Gheje. Imajen/ Egas Cristovão

“Difikuldade ne’ebé ami hasoru iha eskola ne’e mak bee-moos laiha, eletrisidade mós laiha, bee-moos ne’e dezde uluk kedas laiha, kona-ba eletrisidade to’o agora seidauk instala ba ami-nia eskola,” informa Xefe Gabinete apoia Tekniku EBC 1,2,3 Fleicha,  Adelburga Gheje, ohin ba Agência TATOLI iha nia servisu fatin, Fleicha, Maubisse.

Atu bele atende nesesidade mestre ho estudante sira nia kona-ba bee-moos, maka eskola husu aijuda ba estudante ho mestre sira kuru komunidade nia bee-moos, maibé komunidade ezije eskola tenke selu $50 kada fulan.

“Ne’e mak ami dehan osan kuandu iha ami selu, maibé osan laiha ne’e ami haruka estudante sira ba kuru bee, sira lori bee-moos hosi uma mai eskola masa-ida. Foin daudaun ezame nasionál iha ne’e bee laiha, ami haruka estudante lori bee masa ida hosi uma hodi atende nesesidade,” informa Adelburga Gheje.

Nia husu ba Ministériu Edukasaun atu koordena ho ministériu relevante instala bee-moos ba eskola refere, tanba bee-moos ne’e importante.

Nia subliña, ho bee-moos laiha halo sintina iha eskola refere oras ne’e sai aat no estudante sira atu soe fo’er tenke halai ba ai-laran, maibé ho bai-loron naruk ne’e du’ut mós mate hotu.

“Dalaruma ami ba kuru bee-moos, komunidade sira foti fatuk tuda estudante sira,” Xefe Gabinete EBC Fleicha ne’e fó sasin.

Iha parte seluk, Xefe Gabinete EBC Fleicha ne’e hatutan, difikuldade seluk ne’ebé eskola refere hasoru mak biblioteka laiha, eskritóriu ba profesór sira laiha.

“Problema biblioteka ne’e ami hato’o ona ba edukasaun munisípiu, maibé sira dehan hein, hein no hein to’o agora,” nia tenik hodi lia tuun tan dehan, difikuldade seluk ne’ebé eskola refere hasoru mak matéria prátika nian, livru iha maibé halo prátika bazeia ba teoria mak laiha, entaun susar tebes.

Nia fó ezemplu, matéria Matemátika atu halo prátika labele tanba presiza osan hodi sosa.

“Biblioteka ne’e importante mai ami, se bele halo biblioteka di’ak ida, ne’e para ami-nia livru sira tau iha fatin di’ak. Bainhira labarik sira presiza lee livru entaun lori ba lee iha sala aula depois aula hotu hatama kedas, labele lori ba uma, revista lafaek sira ne’e bele lori ba uma,” hateten Xefe Gabinete EBC Fleicha ne’e.

Estudante iha Eskola Ensinu Báziku Sentrál 1,2,3 Fleicha  hamutuk na’in 528, kompostu hosi estudante mane 260 ho  feto na’in 259  no transferénsia hosi eskola seluk hamutuk sia (9).

Jornalista : Evaristo Soares Martins

Editór       : Francisco Simões

HAKEREK NO HATÁN

Please enter your comment!
Please enter your name here