Sentru Saúde Internamentu Ainaro. Imajen/Egas Cristovao

AINARO, 19 novembru 2019 (TATOLI) —Tinan barak ona Sentru Saúde Internamentu Ainaro enfrenta problema bee-moos. Nune’e, Xefe Sentru Saúde refere  sempre hato’o pedidu ba Ministériu Saúde Munisípiu atu bele buka solusaun, maibé to’o ohin loron situasaun ne’e seidauk iha solusaun hodi prejudika  atendimentu sentru saúde nian.

Xefe Sentru Saúde Internamentu Ainaro, Arquimenio Orlean de Araújo. Imajen/ Egas Cristovão

Xefe Sentru Saúde Internamentu Ainaro, Arquimenio Orlean de Araújo, informa, bainhira bailoron naruk Postu Administrativu Ainaro Villa sempre menus bee-moos, tanba ne’e presiza tanki konservatóriu bee-moos no sentru saúde rasik la iha tanki rezerva bee-moos nian.

“Kuandu bailoron naruk, bee-moos sempre menus, ami iha problema bee-moos tanba laiha tanki rezerva. Kuandu udan boot ruma ka bailoron naruk ami a laiha bee rezerva, preokupasaun ne’e durante ne’e ha’u sempre lamenta,” hateten Arquimenio Orlean de Araújo, ohin, ba Agência TATOLI iha nia servisu fatin Sentru Saúde Internamentu Ainaro.

Xefe Sentru Saúde Internamentu ne’e sempre ko’alia ho Diretór Saúde Munisípiu, Administradór Munisípiu, Vise-Ministru Saúde rasik kona-ba asuntu ne’e, maibé to’o oras ne’e laiha resposta.

“Durante ne’e bee kanaliza hosi Servisu Água no Saneamentu (SAS) mak direita maibé ita la garante ninia kualidade. Sa tan, bailoron naruk bee-moos bele maran,” nia hateten.

Maske Sentru Saúde Internamentu Ainaro ne’e laiha tanke rezerva, maibé laboratóriu nasionál sempre foti sampel ba halo teste hodi garante bee ninia kualidade.

“Laiha tanki rezerva mak bee-fo’er tama direita no mós laiha infiltrasaun di’ak,” nia tenik.

Ho problema ne’e, nia husu Ministru Saúde hadi’a sistema burokrasia, nune’e bele envolve Xefe Sentru Saúde sira iha planu, tanba nia mak hatene nesesidade sentru ida nian.

Nia dehan, durante ne’e enkontru entre saúde munisípiu no nasionál menus tebes, entaun susar tebes atu informa preokupasaun hirak ne’e.

Nia subliña, sentru saúde ne’e seidauk iha estatutu entaun podér sira ne’e sentraliza iha munisípiu hotu, entaun kompeténsia sira mak foti hotu.

“Maibé programa servisu nian di’ak tanba orsamentu direita hosi Governu Sentrál, tanba ita-nia polítika ne’e sentralizadu iha ministériu,” nia hateten.

Jornalista : Evaristo Soares Martins

Editór        : Francisco Simões

HAKEREK NO HATÁN

Please enter your comment!
Please enter your name here