Ministra Finansa ein ezersísiu, Sara Lobo Brites, hamutuk ho Diretór Jerál Ministeriu Finansa, hala’o audiensia ho Komisaun C, D No E kona-ba OJE 2020. Imajen/TATOLI Egas Cristovao.

DILI, 19 novembru 2019 (TATOLI) – Prezidente Komisaun C Parlamentu Nasionál (PN) ne’ebé trata asuntu finansa públika, Fernanda Lay, hateten maneira ba redusaun Orsamentu Jerál Estadu (OJE) 2020 sei liuhosi aprezentasaun proposta hosi deputadu sira durante diskusaun iha plenária.

“Ami la halo fali audiénsia públiku ona, ami bolu de’it sira (Governu) mai konfirma de’it tanba audiénsia ne’e maka determina ami entende katak ita-boot sira sei labele utiliza ne’e no ami ko’a ida ne’e no proposta sei halo durante plenária”, hateten Deputada Fernanda Lay ba jornalista sira iha PN, ohin.

Fernanda Lay esplika kona-ba halo redusaun ba proposta OJE 2020 katak Governu konkorda ona ho reuniaun entre Deputadu AMP ho Governu, maibé atu redús ba hira tenke haree filafali labele ko’a de’it. “Ne’ebé ami sei haree hodi redús ba biliaun $1,3 ou biliaun $1,6″.

“Ami sei haree hodi redús, maibé tenke haree filafali ko’a ba saida. Konsiderasaun saida maka tenke hodi ko’a, primeiru; ezekusaun sira-nian ki’ik iha 2019, osan restu sei iha, enkuantu iha 2020 ita-nia orsamentu boot tebes iha risku, ita foti osan hosi fundu Mina-rai barak liu sustentabilidade ita laiha”, katak Fernanda.

Tanba ne’e maka tuir Prezidente Komisaun C ne’e katak, maioria sira identifika maka iha kapitál menór, transferénsia publika no mós bens no servisu maka sa’e maka’as.

“Ida ne’e uza laiha investimentu iha ne’ebá. Uza tiha hotu ne’e hotu ona, tanba ne’e maka sai preokupasaun Parlamentu nian, maibé ami sei iha diálogu nafatin ho Governu para hodi haree tetu ida ne’e maka sei korrije para ami hodi hato’o iha debate jeneralidade no espesialidade”, subliña reprezentante povu ne’e.

Deputadu bankada CNRT ne’e hatete ideál liu ba OJE 2020 maka biliaun $1,3.

Iha konferénsia daruak Aliansa Mudansa ba Progresu (AMP) liuhusi Koordenadór Jerál AMP, Francisco Kalbuadi Lay, hateten Primeiru-Ministru (PM), Taur Matan Ruak, atribui ona kna’ar ba Ministra Finansa, Sara Lobo Brites no Parlamentu Nasionál (PN) atu halo redusaun ba OJE 2020.

“Agora, Primeiru-Ministru, Taur Matan Ruak, hamutuk ho Diretiva Nasionál fó ona kna’ar ne’e tomak ba iha Ministra Finansa ho Parlamentu Nasionál inklui xefe bankada no xefe komisaun sira, atu haree no hadi’a ho didi’ak”, nia dehan ba jornalista sira iha Tibar, Postu Administrativu Bazartete, Munisípiu Liquiçá, foin lalais ne’e.

Iha rezolusaun númeru 2/2019 konferénsia nasionál AMP, rezulta pontu ualu importante no iha pontu tolu hateten kata AMP endosa planu asaun anuál no orsamentu ba tinan 2020, ne’ebé mak aprezenta husi portavós AMP, nu’udár mós Primeiru-Ministru Governu Daualuk ho observánsia ba, primeiru, komentáriu no sujestaun ne’ebé aprezenta ona husi kada responsavel komisaun parlamentár (Komisaun A to’o G)  ba kada setór/liña ministeriál inklui nosaun atu halo hikas ezersísiu hodi redús montante Orsamentu Jerál Estadu 2020.

Segundu, kustamentu ba planu asaun anuál inklui define meta anuál nian tenke aprezenta duni husi instituisaun Estadu/liña ministeriál sira rasik.

Terseiru, asegura kontinuidade no melloramentu sistema planeamentu no orsamentu 2020 ne’ebé orientadu ba rezultadu, iha ne’ebé aliñadu ho programa tinan lima Governu Daualuk, inklui aliñamentu ho liña orientasaun jerál ne’ebé aprezenta no endosa ona iha konferénsia nasionál daualuk AMP nian.

Antes ne’e, Deputadu Bankada CNRT, Domingos de Carvalho, dehan montante orsamentu 2020 tenke hanesan ho 2019 nian, ne’ebé hafoin re apresiasaun no halo redusaun millaun $650, montante ikus ne’ebé hetan promulgasaun husi Prezidente Repúblika, Francisco Guterres ‘Lú Olo’ maka biliaun $1,482.

Nia subliña, proposta OJE 2020 tenke iha padraun ida katak to’o biliaun $1,3 ka biliaun $1,4, nune’e labele liu Rendimentu Sustentável Estimadu (RSE).

Entretantu, iha fulan kotuk, Governu liuhosi Konsellu-Ministru aprova proposta orsamentu 2020 ho montante biliaun $1.950. Hosi montante orsamentu ne’e fahe ba kategoria ba saláriu no vensimentu millaun $241,271, bens no serbisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here