Imajen Portu Dili. Foto espesiál

DILI, 19  novembru 2019 (TATOLI) – Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves,  informa aloka ona orsamentu rihun $500  atu halo reabilitasaun ba uma terminál Portu Dili nian, tanba sai odamatan ne’ebé presiza hatudu imajen Timor-Leste nian ba sidadaun estranjeira no turista sira.

“Ita haree durante ne’e ró kruzeiru sira mai vizita ita-nia nasaun ne’e, maibé kondisaun uma ba terminál ne’e aat liu, entaun tempu besik reabilita ho orsamentu rihun 500”, Prezidente APORTIL afirma ba Tatoli iha Portu Dili, ohin.

Flávio Cardoso Neves friza APORTIL koordena ona ho Ajénsia Dezenvolvimentu Nasionál (ADN), Komisaun Grande Projetu no Komisaun Nasionál Aprovizionamentu (CNA, sigla portugés), atu hahú loke ona konkursu tanba orsamentu ne’e prevee iha Fundu Infrastrutura iha 2018.

“Planu no dezeñu hotu ona, agora, hatama ona ba CNA hodi prosesa konkursu públiku (tender) atu hahú ona reabilitasaun lalais tanba hanesan odamatan boot ba Timor-Leste”, katak.

Nia adianta realidade orsamentu ba reabilitasaun uma terminál ne’e iha, mas implementasaun mak to’o agora la la’o. Nune’e, importante halo koordenasaun entre liña institusionál hodi halais reabilitasaun.

Presiza reabilitasaun uma terminál ne’e atu hatudu ambiente foun tanba ema ka vizitante ida tun husi ró atu bá tama ta’uk tanba haree kondisaun uma ne’e.

“Ita haree fíziku uma ne’e sei forte hela, ne’ebé ita halo reabilitasaun de’it no aumenta hadi’a buat balun iha laran hanesan toilet, ema mai bele tuur, hemu buat ruma hodi hein transporte hafoin sai, ida ne’e mak ita foka liu”, nia afirma.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here