Prezidente interinu Autoridade RAEOA-ZEESM sesante, Arsénio Paixão Bano, bainhira partisipa iha seremónia pose Prezidente Autoridade, José Luís Guterres ‘Lugu’, iha Palásiu Governu, kuarta ne’e. Imajen/António Gonçalves

DILI, 18 novembru 2019 (TATOLI) – Prezidente sesante interinu Autoridade Rejiaun Administrativa Espesiál Oe-Cusse Ambeno (RAEOA) no Zona Ekonomia Espesiál Merkadu Sosiál (ZEESM), Arsénio Bano, hateten sekretáriu rejionál sira hamutuk ho ekipa téknika halo aprezentasaun ba Prezidente Autoridade RAEOA-ZEESM, José Luis Guterres.

Aprezentasaun ne’e hala’o iha sede nasionál RAEOA-ZEESM Faról, Dili, ohin.

“Ami mai ekipa boot ida hosi Rejiaun Administrativa Espesiál Oe-Cusse Ambeno, kompostu hosi sekretáriu rejionál na’in-neen, totál ekipa besik 22 ho tékniku sira hotu atu fó briefing tomak kona-ba Oe-Cusse ba setór hothotu”, haktuir Arsénio Bano ba jornalista sira.

Arsénio hatutan, asuntu ne’ebé diskute maka finansa, edukasaun, infraestrutura, ordenamentu territóriu ba saúde ninian no serbisu jerál Oe-Cusse nian.

“Prezidente tenta rona buat hothotu ne’ebé ami aprezenta, tékniku no asesór prezidente nian mós marka prezensa hotu. Ami sei serbisu barak ba oin atu kontinua haree Oe-Cusse ne’e oinsá”, dehan Arsénio.

Arsénio salienta, preokupasaun barak mós tékniku sira hato’o relasiona ho orsamentasaun ba 2020 ne’e, programa barak atu halo sai pilotu, kontinua mehi Timor-Leste atu kria rejiaun pilotu ida más la fásil, maibé depende ba polítika prezidente foun, maibé nia foin nomea tan ne’e presiza tempu no rona tékniku sira no rona sekretáriu rejionál liuhosi aprezentasaun.

Iha aprezentasaun sekretáriu rejionál no tékniku sira mós esplika katak iha OJE 2020 ba RAEOA iha kapitál rua (dezenvolvimentu-menór) laiha.

“Ami-nia proposta ba iha OJE 2020 nian maka millaun $126 ho objetivu atu kompleta programa tomak, atubele halo dezenvolvimentu iha área rurál, levantamentu halo hotu ona iha territóriu tomak, hanesan bee-moos, agrikultura”, katak Arsénio.

Arsénio Babo mós prontu atu serbisu nafatin ho prezidente no estrutura. “Ami prontu atu apoia Prezidente Autoridade foun. Ha’u la’ós foin serbisu ba Estadu Timor-Leste, maibé ha’u servisu tinan 20 ona hosi Governu tranzisaun to’o agora no sempre prontu satán ha’u ema Oe-Cusse”, subliña Arsenio.

Entretantu aprezentasaun ne’e hala’o durante loron tomak, ne’ebé partisipa maioria hosi sekretáriu rejionál sira no Prezidente Autoridade sesante rasik.

Jornalista : Antónia Gusmão  

Editora : Maria Auxiliadora

HAKEREK NO HATÁN

Please enter your comment!
Please enter your name here